Žychar Čačerska vykazaŭsia pra Łukašenku na pryjomie ŭ psichijatra, skončyłasia kryminalnaj spravaj
Na Juryja Kavalova, jaki žyvie ŭ Čačersku (Homielskaja vobłaść) zaviali kryminalnuju spravu pa artykule 368 KK («abraza prezidenta»), piša Radyjo Svaboda.
Juryj Kavaloŭ z unučkaj.
«Na mianie kryminalnuju spravu raspačali za toje, što skazaŭ praŭdu. Byŭ na pryjomie ŭ doktara-psichijatra, prachodziŭ kamisiju na prava kiravańnia aŭtamabilem. Nu i vykazaŭsia…. A doktarka paviedamiła ŭ milicyju toje, što ja skazaŭ», — raspavioŭ Svabodzie Juryj Kavaloŭ.
Jon u 2020—2021 hodzie šmat razoŭ traplaŭ na «sutki» za «niesankcyjanavanyja masavyja mierapryjemstvy».
«Dzie ja tolki nie siadzieŭ: i ŭ Brahinie, i ŭ Homieli, i ŭ Čačersku, i ŭ Buda-Kašalovie. Ciapier jašče i pravodzili sa mnoj sudova-miedycynskuju ekśpiertyzu», — dadaŭ žychar Čačerska.
Padčas minułaj kampanii Kavaloŭ ahitavaŭ za Śviatłanu Cichanoŭskuju. Jahony syn Arciom źjechaŭ ad pieraśledu. Niaviestka Kavalova Kaciaryna zastałasia z dvuma małymi dziećmi, jakim 4 miesiacy i 4 hady.