Źmiena pracy i źniešnaści. Łukašenka padpisaŭ papraŭki ŭ zakon ab dziaržabaronie sudździaŭ i inšych słužbovych asob
Čynoŭniki, siłaviki, sudździ, a taksama inšyja asoby — ad žurnalistaŭ da členaŭ vybarčych kamisij, u dačynieńni da jakich u MUS pastupić zvarot ad kiraŭnika dziaržorhana ab pahrozie zamachu na ich žyćcio, zdaroŭje abo majomaść, zmohuć trapić pad abaronu ŭładaŭ. Takija źmieny ŭniesienyja ŭ zakon «Ab dziaržaŭnaj abaronie sudździaŭ, słužbovych asob pravaachoŭnych i kantralujučych (nahladnych) orhanaŭ, supracoŭnikaŭ orhana dziaržaŭnaj achovy», piša Tut.by sa spasyłkaj na BiełTA.
«Abaranianaja asoba», a taksama jaje blizkija mohuć raźličvać na šyroki śpiektr sposabaŭ abarony — ad pieravodu na inšuju słužbu abo pracu da źmieny źniešnaści, kali harantavać jaho biaśpieku inšymi mierami nielha. Dla hetaha treba napisać zajavu abo prosta dać zhodu.
Padstavaj dla prymianieńnia mier biaśpieki moža stać zajava taho, chto prosić ab abaronie, zvarot staršyni suda abo kiraŭnika dziaržorhana, u jakim pracuje abo słužyć abaranianaja asoba, apieratyŭnyja źviestki pra pahrozu jaho žyćciu abo zdaroŭju.
Abnoŭleny zakon taksama istotna pašyraje śpis asob, na jakija raspaŭsiudžvajecca dziaržaŭnaja abarona. Naprykład, u pieraliku tych, chto padpadaje pad abaronu, źjaviŭsia punkt «i inšych asob». Da liku «inšych asob» buduć adnosicca hramadzianie Biełarusi, zamiežnyja hramadzianie abo asoby biez hramadzianstva, u dačynieńni da jakich u MUS pastupić zvarot ab najaŭnaści zamachu na ich žyćcio, zdaroŭje abo majomaść.
Zakon ustupić u siłu praź miesiac paśla jaho aficyjnaha apublikavańnia.