Palitviaźnia Łukaševiča prysudzili da 3 hadoŭ kałonii za spaleńnie na Mahiloŭščynie lalek-čynoŭnikaŭ
Sud Mahiloŭskaha rajona 7 červienia prysudziŭ 46-hadovaha palitviaźnia Dźmitryja Łukaševiča da troch hadoŭ kałonii ahulnaha režymu pavodle dvuch artykułaŭ Kryminalnaha kodeksa: č. 2 art. 339 (Złosnaje chulihanstva) i č. 2 art. 368 (Abraza prezidenta). Mužčynu asudzili za vyrab i spaleńnie lalek. Taki prysud vynies sudździa Maksim Kurpačenka, paviedamlajuć mahiloŭskija pravaabaroncy «Viasny».
U samym pačatku pracesu 4 červienia dziaržaŭny abvinavaŭca chadajničaŭ, kab praces prajšoŭ u zakrytym režymie, patłumačyŭšy, što śviedkami pa spravie buduć prachodzić ludzi, jakija zamiašanyja ŭ inšym epizodzie «spravy lalek». Sudździa zadavoliŭ chadajnictva — pasiadžeńni prachodzili ŭ zakrytym režymie.
Pavodle infarmacyi pravaabaroncaŭ, mužčynu pryznali vinavatym u vyrabie i spaleńni lalek. Jak da hetaha stała viadoma ad adnoj ź fihurantak spravy, jakaja pakinuła Biełaruś, Łukaševiču stavili ŭ vinu spaleńnie lalek u pustelnym miescy pamiž Mahilovam i vioskaj Hai.
Mahiloŭca z 2 sakavika ŭtrymlivali pad vartaj. Pravaabarončyja arhanizacyi Biełarusi pryznali jaho palitviaźniem.