Maładziečanca asudzili za abrazu načalnika Maładziečanskaha RAUS
Prysud vyniesła 1 lipienia sudździa Ina Kachanoŭskaja — 1 hod i 6 miesiacaŭ chatniaj «chimii» i 1500 rubloŭ kampiensacyi maralnaj škody Vadzimu Pryhary, paviedamlaje Rehijanalnaja hazieta.
U razhladzie spravy ŭdzielničaŭ dziaržaŭny abvinavaŭca Žuk i abaronca Kanančuk. Paciarpieły — načalnik Maładziečanskaha RAUS Vadzim Pryhara.
Asudžanamu Iharu Sidaroviču 48 hod. Jon maje invalidnaść druhoj hrupy.
Sioleta 31 sakavika sud Maładziečanskaha rajona asudziŭ Ihara Sidaroviča pa častcy 1 artykuła 342 Kryminalnaha kodeksa «Aktyŭnyja dziejańni, što parušajuć hramadski paradak». Jaho razam ź piaćciu maładziečancami sudzili pa spravie ab pierakryćci Vialikaha Haścinca 21 listapada z baneram «Pakul u krainie biezzakońnie, supraciŭleńnie — naš doŭh». Pa vynikach hetaha raźbiralnictva Ihar Sidarovič atrymaŭ štraf u pamiery 140 bazavych vieličyń, što składaje 4060 rubloŭ. Štraf na momant novaha prysudu nie vypłačany.
U miežach ciapierašniaha raźbiralnictva jamu pastavili ŭ vinu złačynstva, praduhledžanaje artykułam 369 Kryminalnaha kodeksa «Abraza pradstaŭnika ŭłady».
Sud pastanaviŭ pryznać vinavatym Ihara Sidaroviča ŭ abrazie pradstaŭnika ŭłady ŭ suviazi z vykanańniem tym słužbovych abaviazkaŭ pry dapamozie infarmacyi, raźmieščanaj u internecie. I pryznačyć pakarańnie ŭ vyhladzie abmiežavańnia svabody biez nakiravańnia ŭ papraŭčuju ŭstanovu na 1 hod i 6 miesiacaŭ. Sud vyrašyŭ zadavolić hramadzianski isk paciarpiełaha Vadzima Pryhary ab spahnańni materyjalnaj kampiensacyi maralnaj škody ź Sidaroviča. Sidarovič pa rašeńni suda pavinien vypłacić Pryhary 1500 rubloŭ. Termin dla spahnańnia ŭstanavili ciaham adnaho miesiaca.
Rečavyja dokazy pa spravie — čatyry listy skrynšotaŭ telehram-hrupy «Maładziečna dla žyćcia čat», skrynšoty na siami staronkach z telehram-kanałaŭ «Karniki Maładziečna» i «Čornaja kniha Biełarusi», bankaŭskaja kartka, šeść dyskaŭ, što źjaŭlajucca dadatkam pratakoła ahladu, čatyry dyski, što źjaŭlajucca dadatkam zaklučeńnia ekśpiertaŭ, dva dyski z telefonnymi złučeńniami.
Mabilny telefon asudžanaha kanfiskavali ŭ dachod dziaržavy.
Pryhavor moža być abskardžany.