Futbalistu Raścisłavu Šavielu prakuror zapytaŭ try hady «chatniaj chimii»
U sudzie Zavodskaha rajona Minska 20 vieraśnia razhladałasia kryminalnaja sprava pa abvinavačvańni troch žycharoŭ stalicy ŭ arhanizacyi abo aktyŭnym ŭdziele ŭ hrupavych dziejańniach, jakija hruba parušajuć hramadski paradak (art. 342 KK RB). Na łavie padsudnych troje — Vadzim Šašura, Raścisłaŭ Šaviel i Mikita Jermakoŭ. Usie jany adnahodki, 2001 hoda naradžeńnia, piša «Viasna».
Abvinavačanyja pryznali vinu va ŭdziele ŭ niesankcyjanavanych masavych mierapryjemstvach, jakija adbyvalisia ŭ Minsku: Šašura i Jermakoŭ — 25 kastryčnika 2020 hoda, Šaviel — 25 kastryčnika i 1 listapada.
Raścisłaŭ Šaviel — były futbalist «Haradziei».
Sa žniŭnia minułaha hoda pa viasnu 2021-ha jaho zatrymlivali trojčy i adpraŭlali adbyvać administracyjnyja aryšty. Apošni raz, 17 maja, jamu prysudzili 15 sutak za niepadparadkavańnie milicyi, adnak paśla ich adbyćcia jon na volu nie vyjšaŭ.
Stała viadoma, što jaho pieraviali ŭ SIZA №1 na Vaładarskaha i vystavili abvinavačvańnie pa artykule 342 Kryminalnaha kodeksu (aktyŭny ŭdzieł u hrupavych dziejańniach, jakija hruba parušajuć hramadski paradak). Hetuju kryminalnuju spravu na Raścisłava zaviali paśla akcyi — šeścia ŭ Kurapaty 1 listapada.
Siarod inšaha, stała viadoma, što intervju taksama źniavolenamu žurnalistu Alaksandru Ivulinu traktujecca jak dokaz viny Šaviela
Tam Raścisłaŭ raspaviadaŭ pra ŭdzieł u maršach i svaich pieršych vybarach. Raspavioŭ jak chadziŭ 10 žniŭnia na Puškinskuju, jak atrymaŭ porcyju ślezaciečnaha hazu, jak ich atačyli siłaviki, jak čuli streły, paśla čaho ŭbačyli chłopca na ziamli.
Padčas sudovych sprečak prakuror zapytaŭ:
Vadzimu Šašuru — dva z pałovaj hoda abmiežavańnia voli biez nakiravańnia va ŭstanovu adkrytaha typu;
Raścisłavu Šavielu — try hady abmiežavańnia voli biez nakiravańnia va ŭstanovu adkrytaha typu;
Mikitu Jermakovu — dva z pałovaj hoda abmiežavańnia voli biez nakiravańnia va ŭstanovu adkrytaha typu;
Prysud budzie abvieščany 22 vieraśnia.