Pa ANT vyjšaŭ siužet pra zatrymanych rabočych: 13 čałaviek abvinavačvajuć u zdradzie dziaržavie i ekstremiźmie
Pa ANT pakazali siužet ab arhanizacyi «Rabočy ruch». Pavodle infarmacyi telekanała, pa kryminalnaj spravie zatrymanyja 13 čałaviek, jany znachodziacca ŭ SIZA KDB. Siarod artykułaŭ, jakija im staviać u vinu, — zdrada dziaržavie.
Aŭtary siužetu śćviardžajuć, što metaj «Rabočaha ruchu» była arhanizacyja zabastovak na biełaruskich pradpryjemstvach, pramysłovy špijanaž, «dyviersijnaja dziejnaść» i «pahrozy kiraŭnictvu, čynoŭnikam, siłavikam». Taksama pa dziaržkanale zajavili, što arhanizacyju kantralavali śpiecsłužby ZŠA i Litvy. U efir vyjšli frahmienty kanfierencyj u Zoom, u jakich roznyja ludzi kažuć pra strajki ŭ Biełarusi.
«Kali b rabočyja nie vyjšli na strajk, naprykład, «Hrodna Azot» spynili b, pierakryŭšy vodazabor. Heta vyklikała b avaryjnaje prypynieńnie vytvorčaści», — paviedamiŭ zakadravy hołas.
Pa słovach aŭtaraŭ siužetu, adnoj z metaŭ «ekstremistaŭ i ich zamiežnych kurataraŭ» byŭ «Hrodna Azot». Adnak «scenary spynieńnia cechaŭ» raspracoŭvalisia i dla inšych pradpryjemstvaŭ, u ich liku — «Naftan», Biełaruski mietałurhičny zavod, MAZ, Minski zavod kołavych ciahačoŭ, Biełaruskaja čyhunka.
Taksama ŭ efiry pakazali frahmient dopytu nienazvanaha čałavieka ŭ nienazvanym miescy. Dopyt vioŭ nieviadomy sa źmienienym hołasam.
— Vajciachovič abmiarkoŭvaŭ z vami pytańni ździajśnieńnia ŭ dačynieńni da abjektaŭ Biełaruskaj čyhunki jakich-niebudź dziejańniaŭ, źviazanych z błakavańniem ruchu, naniasieńnia majomasnaj škody? — spytaŭ čałaviek za kadram.
— Tak, — adkazaŭ čałaviek u čyrvonaj kurtcy.
— Jakija pytańni abmiarkoŭvalisia?
— Nu, zakładki kłaści.
«Raspačata kryminalnaja sprava adrazu pa niekalkich artykułach Kryminalnaha kodeksa: zdrada dziaržavie i stvareńnie ekstremisckaha farmiravańnia. U SIZA KDB źmieščanyja 13 čałaviek. Bolšaść ź ich užo dali pryznalnyja pakazańni», — paviedamili ŭ teleefiry.