«Madam i jaje dzieci revalucyi». Makiej vykazaŭsia pra Śviatłanu Cichanoŭskuju i jaje kamandu
U siužecie STV Uładzimir Makiej, jaki znachodzicca ŭ Ńju-Jorku na Hienieralnaj siesii AAN, raspavioŭ, što biełaruskaja delehacyja daniesła ŭ AAN svaju pazicyju ab situacyi ŭ krainie i pierśpiektyvy raźvićcia kanstytucyjnaha pracesu. Pa słovach ministra, havaryłasia i pra toje, što tolki evalucyjny šlach raźvićcia moža zabiaśpiečyć pośpiech u raźvićci dziaržavy i hramadzianskaj supolnaści i pryviadzie da sapraŭdnaj demakratyi, pra jakuju «mnohija tak kłapociacca». Prajšoŭsia jon i pa Śviatłanie Cichanoŭskaj i jaje kamandzie.
— Mnie ŭdałosia pačuć kanfidencyjnyja acenki z boku maich jeŭrapiejskich kalehaŭ u adras viadomaj madam, jakaja znachodzicca va ŭciokach za miažoj i inšych jaje kalehaŭ, dziaciej revalucyi (havorka pra Śviatłanu Cichanoŭskuju i jaje kamandu. — NN). Viedajecie, acenki — dasłoŭna ja chaču skazać — što madam adčuvaje siabie vielmi niervova. Z ulikam taho, što ničoha, napeŭna, nie atrymlivajecca ź ich abiacańniaŭ. Ja tak zrazumieŭ, što vielmi mnohija dosyć skieptyčna aceńvajuć naohuł dziejnaść hetych dziaciej revalucyi. Ale, na žal, z ulikam hramadskaj dumki ŭ svaich krainach nie mohuć adkryta kazać pra heta, tamu vymušanyja iści na niejkija kroki, jakija nibyta śviedčać ab padtrymcy dziejnaści voś hetych dziaciej revalucyi.
Zatym kiraŭnik MZS pieraklučyŭsia na «niekatorych kalehaŭ», jakija, «zapytaŭšy sustreču, admovilisia ad jaje». Miarkujučy pa ŭsim, jon mieŭ na ŭvazie kiraŭnika polskaha MZS Źbihnieva Rau, pieramovy ź jakim, pa źviestkach «Našaj Nivy», pavinny byli prajści jakraz u Ńju-Jorku.
— Choć jość ab čym pahavaryć, jość što abmierkavać. Pa vynikach razmovy mahli b być vypracavany niejkija kankretnyja napramki supracoŭnictva. Ale … — Makiej razvodzić rukami. — Heta taksama pakazčyk taho, jak jany chočuć vyrašać tyja prablemy, jakija, skažam, znachodziacca ŭ našym paradku dnia i jakija pavinny vyrašacca.