Alena Makoŭskaja: Heta zakanamierna, što nas pačuli ŭłady
Paśla abrańnia na pasadu staršyni ZBS «Baćkaŭščyna» Alena Makoŭskaja adkazała na pytańni «NN».
Paśla abrańnia na pasadu staršyni ZBS «Baćkaŭščyna» Alena Makoŭskaja adkazała na pytańni «NN».
«Naša Niva»: Zadavolenyja pracaj źjezdu?
Alena Makoŭskaja: Jak arhanizataru mnie vielmi ciažka vykazać abjektyŭnaje mierkavańnie. Bo na nas lehli ŭsie arhanizacyjnyja momanty, my vielmi pieražyvali, kab usio prajšło na vysokim uzroŭni. Dumaju, pra ŭražańni chutčej treba pytacca ŭ delehataŭ. My ž, arhanizatary, ličym, što ŭsio prajšło narmalna.
«NN»: A jak Vam pradstaŭničaść uładaŭ na mierapryjemstvie?
AM: «Baćkaŭščyna» vielmi doŭhi čas apielavała da ŭładaŭ u płanie vyrašeńnia pytańniaŭ biełaruskaj dyjaspary. Ja liču łahičnym i zakanamiernym, što my narešcie byli pačutyja i da nas pryjšoŭ ministr kultury, upaŭnavažany pa spravach relihij i nacyjanalnaściej. My spadziajemsia, što nakont tych pytańniaŭ, jakija byli ahučanyja na źjeździe, buduć pryniatyja kanstruktyŭnyja rašeńni.
«NN»: A ŭ čym u budučyni mohuć pierasiakacca intaresy «Baćkaŭščyny» i dziaržaŭnych ustanovaŭ?
AM: «Baćkaŭščyna» najpierš pradstaŭlaje intaresy siabroŭ našaj arhanizacyi, a ich vielmi šmat, jany raskidanyja pa ŭsich kantynientach. Heta ludzi roznych palityčnych pohladaŭ, roznych kanfiesij, pakaleńniaŭ. Adnak ich abjadnoŭvaje luboŭ da svajoj krainy, i jany mohuć dać vielmi šmat Biełarusi. Dziaržaŭny intares zaklučajecca ŭ padtrymcy hetych ludziej, bo heta naš intelektualny patencyjał, jany mohuć stvarać pazityŭny imidž krainy ŭ śviecie.
«NN»: Leanid Hulaka vykazaŭ škadavańnie, što nie prahučała prapanovaŭ ab supracoŭnictvie ŭ ekanamičnaj halinie.
AM: Takoje pytańnie moža i pavinna stajać. Była siekcyja biźniesmienaŭ, dzie byli, jak pradstaŭniki dyjaspary, tak i nacyjanalnaha biźniesu. Heta i moža być pieršym krokam u supracoŭnictvie. Ale chaču skazać, što pieršy krok nasustrač biełarusam zamiežža pavinna zrabić biełaruskaja dziaržava. Kali hety krok budzie istotny, to biełarusy z usiaho śvietu abaviazkova na jaho adhuknucca.
«NN»: Źjezd prajšoŭ. Ciapier čarha za rucinnaj pracaj. Jakija hałoŭnyja pytańni stajać na paradku dnia arhanizacyi?
AM: Pieršasnaja zadača — vykonvać pryniatuju prahramu źjezdu. Taksama heta praca adnosna pryniaćcia Zakonu «Ab biełarusach zamiežža». Pracy vielmi bahata, i šmat dzie my budziem źviartacca da pradstaŭnikoŭ ułady, bo bieź ich stanoŭčych adkazaŭ niemahčymaje vyrašeńnie prablem.
«NN»: Pierad źjezdam było dosyć šmat razmovaŭ adnosna prychodu ŭ arhanizacyju Alaksandra Kazulina, padtrymka «Baćkaŭščynaj» parasonavaj arhanizacyi «Biełaruski dom», što stvaraje eks‑kandydat na pasadu prezidenta.
AM: Razmovaŭ było šmat, šmat pohladaŭ. Ale davajcie hladzieć na realnyja rečy. Źjezd prajšoŭ kanstruktyŭna, stanoŭča, pryniatyja dakumienty. Ludzi zadavolenyja — i heta samaje hałoŭnaje.
«NN»: Čakali takuju adzinahałosnuju padtrymku?
AM: Ja nie dumała pra heta, ale mnie było nadzvyčaj pryjemna.
***
Alena Makoŭskaja naradziłasia ŭ 1972 hodzie ŭ Kobrynie. Skončyła Linhvistyčny univiersitet i Akademiju kiravańnia pry Saviecie ministraŭ. Adrazu pa atrymańni vyšejšaj adukacyi — u 1994 hodzie — pryjšła pracavać u ZBS «Baćkaŭščyna». Na trecim źjeździe biełarusaŭ śvietu ŭ 2001 hodzie abrana na pasadu staršyni rady mižnarodnaha hramadskaha abjadnańnia ZBS «Baćkaŭščyna». Ad lipienia 2009 hodu — staršynia arhanizacyi.