Biełarusy — najbujniejšaja hrupa inšaziemcaŭ, jakaja sioleta atrymała prytułak u Polščy
Za pieršyja try kvartały biahučaha hoda zajavy ab mižnarodnaj abaronie ŭ Polščy padali amal 5200 zamiežnikaŭ, piša Polskaje radyjo.
Ź lipienia ŭ Polščy prykmietna pavialičyłasia kolkaść zajaŭ ab mižnarodnaj abaronie, infarmuje Upraŭleńnie pa spravach inšaziemcaŭ. Za pieršyja try kvartały hetaha hoda takija zajavy padali amal 5200 zamiežnikaŭ.
Pres-sakratar Upraŭleńnia pa spravach inšaziemcaŭ Jakub Dudziak paviedamiŭ, što da kanca vieraśnia prytułku ŭ Polščy prasili, pierš za ŭsio, hramadzianie Afhanistana i Biełarusi:
— Takija zajavy najčaściej padavali hramadzianie Afhanistana — 1700 čałaviek, u tym liku evakujavanyja ŭ Polšču supracoŭniki polskaha vajskovaha kantynhientu i dypłamatyi. Na druhim miescy hramadzianie Biełarusi — 1400 čałaviek. Dalej Rasii — 800 čałaviek, Iraku — 500 i Ukrainy — 200 čałaviek.
Jak skazaŭ Jakub Dudziak, siarod razhledžanych zajaŭ, amal u pałovie vypadkaŭ byli vyniesieny stanoŭčyja rašeńni:
— Ciaham pieršych troch kvartałaŭ biahučaha hodu mižnarodnuju abaronu ŭ Polščy atrymali 934 inšaziemcy. U asnoŭnym ź Biełarusi — 733 asoby, Rasii — 64 asoby i Turcyi — 48 asob. U dačynieńni da 941 inšaziemca byli vydadzienyja admoŭnyja rašeńni. U asnoŭnym heta byli hramadzianie Rasii i Ukrainy.