Maładafrontaŭcy paznali vykradalnika + fota
Nasta Pałažanka i Dzianis Karnoŭ padali zajavy ŭ prakuraturu i RUUS Frunzienskaha rajonu z patrabavańniem praciahnuć śledstva kryminalnaj spravy pa fakcie vykradańnia 25 sakavika.
Alaksandr Leanienka (sprava).
Nasta Pałažanka i Dzianis Karnoŭ padali zajavy ŭ prakuraturu i RUUS Frunzienskaha rajonu z patrabavańniem praciahnuć śledstva kryminalnaj spravy pa fakcie vykradańnia 25 sakavika.
Na Dzień Voli maładzionaŭ zatrymali kala stancyi mietro «Kamiennaja horka», i advieźli ŭ rajon vioski Tarasava. «Nas siłaj zakinuli ŭ mašynu, adabrali mabilnyja telefony, nasunuli na vočy šapki i pavieźli ŭ Hrodzienskim napramku. Paśla hetaha Dzianisa niekudy pierasadzili, zajaviŭšy, što paviazuć jaho ŭ pastarunak, ale ŭ jaki — nie skazali. Mianie pavieźli dalej i vysadzili z mašyny na trasie ŭ rajonie vioski Tarasava. Nazad ja dabirałasia na spadarožnych mašynach», — raskazvała tady Pałažanka.
Karnova ž advieźli jašče dalej. Jamu zrezali nažom štany, faktyčna pieratvaryŭšy ich u šorty, źbili, a potym vykinuli z mašyny.«Maładafrontaŭcy» adrazu źviarnulisia ŭ milicyju, ale niadaŭna atrymali paviedamleńnie, što rasśledavańnie spravy prypynienaje. Ciapier ža Pałažanka i Karnoŭ prosiać pravieści pravierku pa čałavieku, jakoha jany ličać vykradalnikam.
Maładziony pabačyŭšy ŭ ŚMI fotazdymak supracoŭnika śpiecpadraździaleńnia «Ałmaz» Alaksandra Leanienku, paznali ŭ im čałavieka, jaki kiravaŭ ichnym vykradańniem. U hetym Nasta i Dzianis upeŭnienyja amal stopracentna.
Jon išoŭ pa kryminalnaj spravie pa vykradańniu Źmitra Zavadskaha, ale śledstva nie znajšło dokazaŭ jahonaj viny. U svoj čas Leanienka pracavaŭ u słužbie achovy Łukašenki, a niadaŭna kiraŭnik dziaržavy ŭznaharodziŭ bajca miedalom «Za advahu».
Adkaz z prakuratury i milicyi pavinien pryjści ciaham miesiaca.