Maci anarchista zatrymali pa kryminalnaj spravie. Jaje syna zatrymać nie mohuć — jon uciok z krainy
Pravaabaroncam stała viadoma, što suprać Hajane Achcijan — maci anarchista Ramana Chaliłava — zaviali kryminalnuju spravu pa č. 1 art. 342 KK (arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich).
Z Połacka žančynu pieravieźli ŭ IČU na Akreścina ŭ Minsku. Pry hetym, jana jašče navat nie adbyła 10-sutačny administracyjny aryšt za niepadparadkavańnie milicyjantam.
Nahadajem, 26 listapada siłaviki vyłamali dźviery kvatery Hajane i praviali pieratrus. Samu žančynu zatrymali i dastavili ŭ Połacki HAUS, dzie skłali pratakoł pa art. 24.3 KaAP (niepadparadkavańnie supracoŭnikam milicyi). U toj ža dzień sud pryznačyŭ Hajane 10-sutačny aryšt.
Sam Raman Chaliłaŭ pakinuŭ Biełaruś. Razam ź inšymi anarchistami 29 vieraśnia paśla zabojstva supracoŭnika KDB jon pravioŭ akcyju kala pasolstva Biełarusi ŭ Varšavie. SK tady paviedamlaŭ, što ŭdzielniki akcyi raspaŭsiudžvali źviestki, «nakiravanyja na raspalvańnie sacyjalnaj varožaści, a taksama jakija hieraizujuć terarystyčnuju dziejnaść».
Była zaviedzienaja kryminalnaja sprava pa č. 3 art. 130 (dziejańni, nakiravanyja na ŭzbudžeńnie sacyjalnaj varožaści i varožaści pa prykmietach inšaj sacyjalnaj prynaležnaści) Kryminalnaha kodeksa.