Premjer-ministr Finlandyi parušyła praviły samaizalacyi i pajšła ŭ načny kłub
Premjer-ministr Finlandyi Sana Maryn adpraviłasia ŭ načny kłub, niahledziačy na toje, što viedała ab stanoŭčym teście na karanavirus ministra zamiežnych spraŭ Pieki Chaavista, jaki braŭ udzieł u sustrečy ministraŭ u Stakholmie. Pavodle jaje słoŭ, jana nie atrymała abnoŭlenyja instrukcyi, u jakich ministram rekamiendavali paźbiahać kantaktaŭ ź ludźmi.
Foto: Emmi Korhonen / Lehtikuva
Maryn była schilnaja da ryzyki zaražeńnia ŭ piatnicu, kali razam z Chaavista prymała ŭdzieł u pasiadžeńni ŭrada Finlandyi, piša Yle.
Prykładna dva tydni tamu kanclerka Dziaržrady Finlandyi abnaviła rekamiendacyi, zhodna ź jakimi, ministry pavinny adrazu ŭstrymlivacca ad sacyjalnych kantaktaŭ paśla atrymańnia infarmacyi ab ryzycy zaražeńnia.
Maryn skazała, što da jaje asabista hetyja instrukcyi nie dajšli, ale pryznała, što heta nie źjaŭlajecca apraŭdańniem i jana niasie adkaznaść za toje, što nie atrymała paviedamleńnia.
«Mnie treba było lepš acanić situacyju i pravieryć jašče raz instrukcyi. Ja prašu prabačeńnia za svaje pavodziny, ja dziejničała nie lepšym čynam».
Maryn u subotu ŭviečary byli adpraŭlenyja paviedamleńni ź instrukcyjami adnosna izalacyi, ale premjer-ministr, jakaja znachodziłasia ŭ načnym kłubie, nie pračytała ich, pakolki nie ŭziała z saboj ministerskaha telefona.