U Maładziečnie pačaŭsia sud nad chłopcam, jakoha zatrymali i departavali z Rasii
Sud Maładziečanskaha rajona 8 śniežnia pačaŭ razhlad kryminalnaj spravy pa č. 2 art. 363 KK (supraciŭleńnie z prymianieńniem hvałtu) ŭ dačynieńni da Siarhieja Niepahody, jakoha zatrymali ŭ Rasii i departavali ŭ Biełaruś. Heta treci fihurant spravy za patasoŭku ź siłavikami 19 červienia 2020 hoda ŭ Maładziečnie paśla akcyi salidarnaści, kali pratestoŭcy adbvivali zatrymanaha, a amapaviec dastaŭ pistalet.
Paŭła Piaskova i Uładzisłava Jeŭściahniejeva asudzili da troch hadoŭ kałonii jašče naprykancy vieraśnia 2020-ha. Uładzimir Niepahoda byŭ pryznany padazravanym, ale źjechaŭ za miažu i ŭ sudzie nie ŭdzielničaŭ. Jaho zatrymali 17 sakavika ŭ Sankt-Pieciarburhu, źmiaścili ŭ rasijskaje SIZA na paŭhoda, a kali skončyŭsia termin utrymańnia pad vartaj, to pa pryčynie parušeńnia mihracyjnaha režymu vydvaryli ŭ Biełaruś. Tut jaho źmiaścili pad vartu, paviedamlajuć pravaabaroncy.
Razhladaje spravu sudździa Alaksiej Pietrusievič, a dziaržabvinavačvańnie padtrymlivaje pamočnica prakurora Julija Žuk (jana vystupała dziaržabvinavaŭcaj pa spravie suprać adzinaborca Alaksieja Kudzina).
Paciarpiełymi na sudzie nad Piaskovym i Jeŭściahniejevym vystupili supracoŭniki AMAPa Minabłvykankama Viačasłaŭ Jakavienka i Jaŭhien Baranaŭ (kamandzir atrada). Z-za atrymanych padčas patasoŭki paškodžańniaŭ — niekalki drapin na ruce i kalenie — amapaŭcy nie stracili pracazdolnaść i nie znachodzilisia na lačeńni.
U pieršy dzień suda nie źjavilisia śviedki, tamu jaho praciah adbudziecca 14 śniežnia.