Amal 2 tysiačy hadoŭ turmy. Pravaabaroncy apublikavali statystyku prysudaŭ pa pratesnych artykułach za 2021 hod
Pravaabaroncy «Viasny» praanalizavali fakty sudovaha pieraśledu hramadzian pa «pratesnych» kryminalnych spravach. Da hetaj katehoryi adnosiacca fakty udziełu ŭ masavych biesparadkach, ažyćciaŭleńnia dziejańniaŭ, jakija hruba parušajuć hramadski paradak i niepadparadkavańnie, hvałt i pahrozy jaho ŭžyvańnia da pravaachoŭnikaŭ, ich publičnyja abrazy, apahańvańnie nadpisami čužoj majomaści, chulihanstva, źniavaha dziaržaŭnaj simvoliki.
Biełaruskija ŭłady stali vykarystoŭvać kryminalny pieraśled u jakaści asnoŭnaha instrumienta dla abmiežavańnia hramadzian u ich pravie na svabodnaje vykazvańnie mierkavańnia, na svabodu mirnych schodaŭ i na ŭdzieł u viadzieńni dziaržaŭnych spraŭ z dapamohaj kankurentnych vybaraŭ.
Ź viadomych pravaabaroncam 1285 asudžanych za 2021 hod, pazbaŭleńnie voli ŭžyvałasia da 537 fihurantaŭ, što ŭ adsotkavych suadnosinach składaje 41,8 %.
Ź viadomych PC «Viasna» 1285 asudžanych suadnosiny mužčyn i žančyn skłali 81,8% i 18,2 % adpaviedna.
Bolš za ŭsio asudžanych pa palityčnych kryminalnych spravach zafiksavana ŭ Minsku (388) i Bresckaj vobłaści (351), što ŭ adsotkavych suadnosinach składaje 57,5 % ad ahulnaj kolkaści asudžanych za minuły hod.
Abmiežavańnie voli z nakiravańniem u papraŭčuju ŭstanovu adkrytaha typu («chimija») sudy ŭžyli ŭ 23,7 % vypadkaŭ asudžeńnia ci da 305 fihurantaŭ na ahulnuju sumu 673 hady 1 miesiac. Abmiežavańnie voli biez nakiravańnia ŭ PUAT («chatniaja chimija») sudy ŭžyvali ŭ 29,5 % vypadkaŭ asudžeńnia da 379 fihurantaŭ. Sumarna pakarańnie ŭ vyhladzie «chatniaj chimii» sudy vynieśli na 740 hadoŭ i 6 miesiacaŭ. 29 fihurantaŭ (2,3%) byli asudžanyja da aryštu, što ŭ ahulnaj sumie skłała 6 hadoŭ 2 miesiacy.