«Skazali, što kali nie viarnu hrošy, budzie kryminałka». Minčuk raskazaŭ pra pastku, u jakuju mohuć trapić baćki ź dziećmi za miažoj
Žyćciovym kiejsam padzialiŭsia naš čytač. Za miažoj jon praciahvaŭ płacić padatki ŭ Biełarusi i atrymlivać dapamohu na dziaciej. Akazałasia, hrošy jon musić viarnuć, inakš — kryminałka.
Mužčyna (naš čytač paprasiŭ zachavać ananimnaść) źjechaŭ ź Biełarusi ŭ listapadzie 2021 hoda. Ale praciahvaŭ pracavać dystancyjna na biełaruskuju kampaniju i płacić padatki. U studzieni jon zvolniŭsia.
Dapamohu na dziaciej (siamja vychoŭvaje małych dvuch i piaci hod) minčuk atrymlivaŭ za listapad i śniežań. Paśla zvalnieńnia — nie. Ale vyrašyŭ pierastrachavacca i ŭdakładnić, ci nie parušyŭ čaho.
«Nam paćvierdzili ŭ centry sacyjalnaha absłuhoŭvańnia nasielnictva: tak, zavodzim kryminalnyja spravy, kali čałaviek vyjechaŭ i atrymlivaŭ dapamohu.
Kali pryvodziŭsia arhumient, što ja praciahvaŭ płacić padatki ŭ Biełarusi, adkazali: heta nie maje nijakaha značeńnia. Z momantu, kali vy pierasiekli miažu, vy pavinny ŭsio viarnuć. U maim vypadku treba viarnuć sumu za dva miesiacy, kala 1400 rubloŭ.
Maja kampanija pra heta praviła nie viedała».
U sacsłužbie patłumačyli, što hetaja dapamoha pryviazanaja nie da padatkaŭ, a da faktyčnaha miescaznachodžańnia dziaciej.
Mužčyna raskazvaje, što kali jaho znajomyja niekalki hod tamu źjechali ŭ Polšču i praciahvali atrymlivać dapamohu, pra kryminalnuju spravu havorki nie išło. Praz hod ludziam prosta dasłali papieru, kab jany viarnuli «dziciačyja» vypłaty.
«Ja vyrašyŭ padzialicca kiejsam, bo ludzi, jakija vyjazdžajuć ź dziećmi i płaciać padatki ŭ Biełarusi, mohuć patrapić u takuju pastku. Na aŭtamacie atrymlivać dapamohu i nie viedać, što heta moža padvieści ich pad kryminałku», — kaža naš čytač.
Što kaža zakon?
Sapraŭdy, kali dzicia bolš čym na dva miesiacy vyjazdžaje ź Biełarusi, vypłata dapamohi na jaho spyniajecca. Vyklučeńnie — tolki dla dziaciej dypłamatyčnych i konsulskich supracoŭnikaŭ i vyjezdaŭ na lačeńnie.
Dapamohi pazbaŭlajuć taksama ŭ vypadku, kali maci ci baćka, jakija atrymlivajuć jaje, vyjazdžajuć na pastajannaje miesca žycharstva za miažu. Heta prapisana ŭ zakonie «Ab dziaržaŭnaj dapamozie siemjam, jakija vychoŭvajuć dziaciej».
Vypłata spyniajecca ź pieršaha čysła miesiaca, nastupnaha za miesiacam vyjezdu. Kali dzicia viartajecca ŭ Biełaruś, to dapamohu znoŭ pryznačajuć, jak tolki baćki źviartajucca pa jaje.
Na dziaciej, jakija bolš za 183 dni ŭ kalandarnym hodzie žyvuć za miažoj, dapamoha vypłačvajecca tolki ŭ toj pieryjad, kali jany pryjazdžajuć u Biełaruś.
Pamiž Dziaržpahrankamitetam i Minpracy i sacabarony jość pahadnieńnie ab pieradačy źviestak pra dziaciej da troch hod, jakija pierasiekli miažu. Takaja infarmacyja paviedamlajecca ŭ Minpracy dvojčy na hod — pa stanie na 1 studzienia i 1 lipienia.
Vypadki, kali za atrymańnie «dziciačych» hrošaj za miažoj zavodzili kryminalnuju spravy, užo byli. Naprykład, z hrodzienkaj Karynaj Malinoŭskaj, jakaja z maleńkim dziciom źjechała ŭ Polšču. Na žančynu ŭ dekrecie zaviali kryminalnuju spravu za machlarstva, paviedamlała letaś MUS.