Padlašski dub, nazvany ŭ honar biełaruskaha piśmieńnika, lidziruje ŭ hałasavańni za Jeŭrapiejskaje dreva hoda
Ahulnajeŭrapiejski anłajn-konkurs «Jeŭrapiejskaje dreva hoda» 11-y hod zapar ładzić arhanizacyja Czech Environmental Partnership Foundation. Pieramožca vybirajecca siarod drevaŭ nie abaviazkova samych starych ci samych pryhožych — hałoŭnaje, kab u dreva była cikavaja historyja. Sioleta ŭ spabornictvie lidziruje 400-hadovy padlašski dub ź imieniem «Dunin», piša mostmedia.io.
Dub Dunin. Fota: treeoftheyear.org
Dub-vołat Dunin nazvany tak u honar biełaruskaha piśmieńnika Vincenta Dunina-Marcinkieviča. Unikalnaje dreva raście ŭ poli kala vioski Prybudki Naraŭskaj hminy, što la Biełaviežskaj puščy. Uzrost duba aceńvajecca ŭ 400 hadoŭ, achop stvała dasiahaje 130 sm, a vyšyniu jon maje kala 5,5 mietra.
Dub Dunin nabraŭ za try dni ŭžo bolš za 19 tysiač hałasoŭ i našmat apiaredžvaje svaich najbližejšych kankurentaŭ. A siarod ich — francuzski 300-hadovy kaštan, rasijski «Dub Turhienieva», brytanskaje nachilenaje dreva i inšyja. Druhoje miesca pakul zajmaje taksama dub, jaki raście ŭ Bankietnym lesie ŭ ispanskaj Halisii. Jon pakul što maje bolš za 8 tysiač hałasoŭ.
Ale hałasavańnie praciahniecca da 28 lutaha, tamu ŭsio moža źmianicca. Pryniać udzieł u hałasavańni možna tut.