The Insider: Źbity na biełaruska-ŭkrainskaj miažy bieśpiłotnik — nie ŭkrainski, a rasijski
Viadomaje svaimi rasśledavańniami vydańnie The Insider śćviardžaje, što na biełaruska-ŭkrainskaj miažy źbili nie ŭkrainski Spectator M1, a rasijski «Arłan». Bo pakazany pa biełaruskim telebačańni bieśpiłotnik padobny mienavita na rasijski.
Bieśpiłotnik, jaki pakazali pa Biełaruskim telebačańni.
The Insider piša:
«Pasoł Ukrainy ŭ Biełarusi Ihar Kizima, admaŭlajučy zapusk bieśpiłotnika ŭkrainskimi siłavikami, zaŭvažyŭ: «Nakolki viadoma, havorka idzie pra bieśpiłotnik «Arłan», jakija jość tolki na ŭzbrajeńni Rasii i Biełarusi».
Pasoł nie zusim dakładny: «Arłany» pastaŭlajucca taksama ŭ Kazachstan, Kyrhyzstan, Mjanmu i Uźbiekistan. Ale pry ciapierašnim stanie rasijska-ŭkrainskich adnosin sapraŭdy było b vielmi dziŭna, kali b Ukraina kuplała vyviedvalnyja drony ŭ Rasii.
BPŁA «Arłan-10»
Biełaruskija vajskoŭcy śćviardžajuć, što źbili nie «Arłan», a Spectator M1 ukrainskaj vytvorčaści. Ale formaj hałaŭnoj častki prademanstravany biełaruskim bokam robat padobny mienavita na «Arłan».
BPŁA Spectator M1
Akramia taho, kryły Spectator zabiaśpiečanyja aeradynamičnymi zakoncoŭkami-vinhletami, čaho niama ŭ «Arłana».