Pakončyć z Hary Poteram

U 9 hadoŭ jana pryjšła na svajo pieršaje aktorskaje prasłuchoŭvańnie. Paśla taho ŭ jaje i vybaru asablivaha nie było — usio žyćcio hrać siabroŭku Hary Potera.

U 9 hadoŭ jana pryjšła na svajo pieršaje aktorskaje prasłuchoŭvańnie. Z taho času ŭ jaje i vybaru asablivaha nie było. Užo 10 hadoŭ adzinaje, što ad jaje patrabujecca — hrać siabroŭku Hary Potera, Hiermijonu Hrejndžer. Bavić čas pamiž hrymiorkaj i zdymkavaj placoŭkaj, razryvacca pamiž bliskučymi premjerami i elitnymi pakazami mod.

Pakul što razam: Rupiert Hrynt, Ema Uotsan i Daniel Redklif.

Ciapier, u 19 hadoŭ jana spraŭdziła ŭsie samyja śmiełyja žadańni luboj dziaŭčynki-padletka i luboha amatara sieryi «Hary Poter».

Jak na ŭzmach čaroŭnaj pałački

Ema Uotsan, choć jašče nie siahnuła ŭzrostu, kali joj možna kuplać ałkahol u Złučanych Štatach, ale ŭžo paśpieła zrabić šykoŭnuju karjeru: źniałasia ŭ šaści samych paśpiachovych z kasavaha hledzišča stužkach apošnich hadoŭ. Naprykład, tolki apošni film ź sieryi, «Hary Poter i Prync-miašaniec» paśpieŭ sabrać za 2 tydni 650 miljonaŭ dalaraŭ.

Kažuć, što sama Ema zarabiła za dziesiacihodździe zdymak bolš za 10 miljonaŭ funtaŭ. U adroźnieńnie ad svajho partniora pa filmie 21-hadovaha Rupierta Hrynta (jon ihraje rudoha Rona Viźli), jaki, kab pierakanać pradusaraŭ i jak najlepš prezientavać svoj talent, na pieršym prasłuchoŭvańni pieraapranuŭsia ŭ žančynu, Ema Uotsan prosta pryjšła, pračytała karacieńki ŭryvak i adrazu atrymała rolu siabroŭki Hary Potera, Hiermijony Hrejndžer.

U svaim intervju jana kaža, što i dumać nie dumała pra takuju papularnaść. Jana, moža, jak šmat chto z anhielskich dzietak, była prychilnicaj knižnaj sieryi pra čaraŭnika-siratu, ale ž nie takoj užo zaŭziataj: joj padabałasia, kali tata čytaŭ pa raździele z kazki pierad snom, i tolki taho. «Na kastynhu ja, viadoma, chacieła atrymać rolu małoj čaraŭnicy Hiermijony, ale kali b daviedałasia, u jaki hrandyjozny prajekt ubłytvajusia, ja by, peŭna ž, atrymała b sapraŭdny šok i, peŭna b nie zdoleła paśpiachova prajści prasłuchoŭvańnie».

Ema Uotsan naradziłasia ŭ Paryžy ŭ siamji advakataŭ. Kali joj było 5 hadoŭ, siamja viarnułasia ŭ rodnuju Anhielščynu, va ŭtulny Kiembrydž. Jaje zorny čas pryśpieŭ, kali na rol Hiermijony pamočnikam pradusara Emu parekamiendavała jaje kłasnaja.

Pakolki aŭtarka knižki, Džoan Roŭlinh nastojvała, kab u halivudskaj pastanoŭcy hałoŭnyja roli hrali anhielskija akciory, dyk u toj čas pamočniki pradusara ledźvie nie nosam ryli anhielskuju ziamlu ŭ pošukach maładych talentaŭ, zavitvajučy mała nie ŭ kožnuju škołu.

Akramia vydatnaha dośviedu i dyvidendaŭ u vyhladzie prestyžnych aktorskich uznaharodaŭ i šmatlikich kantraktaŭ u śviecie vysokaj mody, Ema Uotsan atrymała paśla pracy ŭ filmie svajo niepazbyŭnaje druhoje «ja», Hiermijonu Hrejndžer. Z časoŭ, kali pieršaja stužka «Hary Poter i fiłasofski kamień» pačała ŭ 2001 hodzie svajo tryumfalnaje šeście pa ekranach płaniety, dziakujučy Emie vobraz Hiermijony zrabiŭsia składaniejšym i šmatpłanavym, ale razam z tym zvyčki i dumki vydumanaj Hiermijony byli prysabiečanyja sapraŭdnaj dziaŭčynkaj i pratačylisia ŭ jaje asabisty charaktar. Kažuć, što pa-za zdymačnaj placoŭkaj jana pakrysie zrabiłasia takoj ža vialikaj knižnicaj, jak i Hiermijona, dziaŭčynaj zadumiennaj i dalikatnaj. Časam u realnym žyćci pramaŭlaje cełymi frazami ź filma. Padabienstva nahetulki vialikaje, što ciapier samoj Emie byvaje ciažkavata adroźnić pamiž saboj i svajoj hierainiaj. Ale jana starajecca.

«Kali ja była maładziejšaja, mnie zdavałasia, što Hiermijona — heta ja. Tady ja była małoj dziaŭčynkaj i ad mianie nie patrabavałasia asablivaha aktorskaha majsterstva, tamu maja kolišniaja hulnia bolš była padobnaja da karykaturu na samuju siabie, karykaturu, jakaja nie patrabuje ŭdumlivaści i hłybini, — kaža Ema. — Ciapier ža, pastaleŭšy, ja zrabiłasia nie takoj užo i adnaskładovaj dziaŭčynaj i pryśpieŭ čas dumać pra siabie, jak pra aktrysu, jakaja hraje Hiermijonu, a nie pra siabie, jak pra Hiermijonu».

Krepkaja prafiesijanałka

U lipieni 2010 maje vyjści pieršaja sieryja apošniaj častki «Hary Poter i dary śmierci». Jašče praz hod pakažuć druhuju i apošniuju sieryju ŭ cykle pra Hary Potera. Zdymańnie hetych stužak amal zaviaršyłasia — poteryjada chutka skončycca, i aktorka ciapier na rostaniach. Kali Džoan Roŭlinh napiša jašče adnu častku, ci budzie Ema Uotsan zdymacca ŭ joj? «Ja nikoli nie skažu «bolš nikoli», ale spadziajusia dažyvu, da tych časoŭ kali buduć rabić rymejki na «Hary Potera» bieź mianie», — adkazvaje jana ŭ intervju časopisu Elle. Ciapier Ema Uotsan prafiesijnaja aktorka — joj jość čym pachvalicca ŭ svaim reziume: akramia «čaraŭnickaj» roli jana źniałasia ŭ televizijnym filmie «Baletnyja češki» i atrymała hałoŭnuju rolu ŭ stužcy «Betsi i Napaleon». Ema źjaŭlajecca ŭ rekłamach na vokładkach časopisaŭ mod kštałtu Vogue, jaje zaprašajuć na telepieradačy.

Jaje paplečniki pa filmie Danijel Redklif (jon hraŭ Hary Potera) zdymajecca maniekienščykam i navat pahadziŭsia źniacca aholenym dla hlancavaha časopisa. Darečy, «Hary Poter i prync-poŭkroŭka» byŭ pieršaj stužkaj, jakija Danieł Redklif, Rupiert Hrynt i Ema Uotsan zdymalisia paŭnaletnimi ludźmi — jany navat pryjazdžali na zdymačnuju placoŭku na ŭłasnych mašynach.

Pavodle Uotsan, nasupierak mierkavańniam paparacy, ich z Daniełam i Rupiertam abjadnoŭvała tryvoha pierad budučyniaj, a zusim nie ramantyčnyja suviazi.

Mastactva być zvyčajnym

I voś navina: zamiest taho kab praciahvać aktorskuju karjeru, zamožnaja starletka vyrašyła stać zamiežnaj studentkaj. Ema Uotsan zapisałasia na vučobu va ŭniviersitecie Braŭna ŭ Złučanych Štatach. U intervju Ema moža padrabiazna i doŭha tłumačyć, čym jana roźnicca ad Hiermijony, ale časam prahavorvajecca i pryznajecca, što jany ź jaje hierainiaj vielmi padobnyja i što ŭsio roŭna jak Hiermijona-vydatnica, Ema choča vučycca ŭ surjoznym kaledžy. «Heta, peŭna, budzie taja jašče drama. Ale adčuvaju, što žyćcio, jakoje całkam kruciłasia vakoł Hary Potera, pavinny skončycca. U vieraśni hetaha hoda ja źjedu z Anhlii ŭ ZŠA». Ema pastupiła ŭ kaledž pad svaim druhim imiem Šarłot. «Pryśpieŭ čas pabyć mnie narmalnaj dziaŭčynaj, z narmalnymi siabrami. Razumieju, časam ja pavodžusia ŭsio roŭna jak Hiermijona i žyvu jaje žyćciom zavUčki, ale jakraz vučoba ŭ surjoznaj ustanovie — heta moj sposab dać rady ŭsioj toj mituśni i tarmasie, što abrynulisia na mianie«. Ciapier Ema sama abiraje, što joj rabić u žyćci. «U pryncypie paśla ŭniviera možna viarnucca da aktorskaj hulni — čamu ž nie? Adnak ciapier mnie 19 i ja nie maju ani krychotnaha paniaćcia, što chaču. Jak vy dumajecie, heta narmalna?»

Kamientary da artykuła