Staršynia Jeŭrakamisii: Ukraina pavinna ŭstupić u Jeŭrasajuz, my chočam bačyć jaje ŭ jeŭrapiejskaj siamji
Staršynia Jeŭrakamisii Ursuła fon der Lajen dała intervju telekanału Euronews, dzie adkazała na niekalki važnych pytańniaŭ pra Ukrainu, Rasiju i Jeŭropu.
Ursuła fon der Lajen. Fota: Credit: AP
Siarod inšaha Ursuła fon der Lajen adkazała na pytańnie, nakolki daloka varta Jeŭrasajuzu zachodzić u prajavach salidarnaści z Ukrainaj. Z adkazu vynikaje, što maksimalna daloka:
«U hetaj krainie padzialajuć našy kaštoŭnaści, tam abaraniajuć našy pryncypy. Ukraincy chočuć žyć u mirnaj demakratyi, a Rasija napadaje na jaje. Tamu Ukraina zasłuhoŭvaje našaj poŭnaj salidarnaści, i jana jaje ŭbačyć».
Prytym havorka idzie navat pra afarmleńnie kandydactva na ŭstupleńnie ŭ Jeŭrasajuz:
«Ukraina ŭdzielničaje ŭ niekatorych jeŭrapiejskich pracesach, naprykład, u intehracyi ŭkrainskaha rynku ŭ Adziny rynak ES. My vielmi ciesna supracoŭničajem, naprykład, u enierhietycy, u inšych halinach.
Z časam Ukraina pavinna ŭstupić u Jeŭrasajuz, hetaja kraina — adna z nas, i my chočam bačyć jaje ŭ jeŭrapiejskaj siamji».
Prytym vajna z Rasijaj biezumoŭna pamianiaje i abličča samoha Jeŭrasajuza. Pavodle Ursuły fon der Lajen:
«Pierš za ŭsio, ciapier u najaŭnaści biesprecedentnaje supracoŭnictva i zhurtavanaść usich demakratyčnych krain. Pobač z nami amierykanskija siabry, Vialikabrytanija, Kanada. Da nas dałučylisia Japonija, Paŭdniovaja Kareja, mnohija inšyja. Aŭstralija taksama ŭvachodzić u hetuju hrupu, što pakazvaje: my razam stanovimsia na abaronu demakratyi ŭ Jeŭropie.
Važna, kab my abaraniali naš mirny paradak, paradak, zasnavany na praviłach. My pavinny dakładna zajavić: Jeŭrasajuz nie pacierpić na jeŭrapiejskaj ziamli źnievažańnia našych kaštoŭnaściaŭ».
Što da Uładzimira Pucina, to daviarać jamu Jeŭropa ŭžo nikoli nie zmoža. Tut nijakich sumnievaŭ u staršyni Jeŭrakamisii niama.