Mer Vilni: Ruskija i biełarusy mohuć vystupać u nas z kancertami, tolki kali vyrazna zajaviać ab niazhodzie sa svaimi režymami. Maŭčańnia nie chopić
Mer Vilni Remihijus Šymašus u Facebook paviedamiŭ, što stalica Litvy spyniaje supracoŭnictva z byłymi haradami-partniorami ŭ Biełarusi i Rasii. I akramia taho, u jaho šmat płanaŭ pa zmahańni z rasijskaj prapahandaj i roznymi instytutami pucinskaj «miakkaj siły», piša delfi.ru.
Remihijus Šymašus. Fota: DELFI / Tomas Vinickas
Mer adklikaje dazvoł na praviadzieńnie «Vialikaha maršu ŭ abaronu siemjaŭ», jaki pavinien byŭ adbycca ŭ traŭni, i nie vydaść inšyja dazvoły na takija mierapryjemstvy, kali ŭbačyć choć by najmienšuju suviaź pamiž imi i rasijskaj prapahandaj.
«My sočym za publičnaj prastoraj i bačym, što byłyja i ciapierašnija arhanizatary hetaha mierapryjemstva aktyŭna padtrymlivajuć dziejańni Rasiei, nie tolki skažonyja kaštoŭnaści Kramla.
Vajna — vyraznaja hrań. Kali navat jana nie dapamahła im ačuchacca, to my nie dazvolim, kab mierapryjemstva stała płatformaj dla dureńnia hałoŭ ludziam. Nie padabajecca — možacie iści ŭ sud, udačy», — napisaŭ jon pra «Vialiki marš u abaronu siemjaŭ».
Mer taksama skazaŭ, što paprasiŭ nacyjanalnyja viedamstvy spynić dziejnaść taksi Yandex u Vilni. Nibyta hetym zaniaŭsia ministr transpartu Marus Skuodzis. Šymašus taksama abiacaŭ zrabić usio, kab u parku Vinhis bolš nie śviatkavali Dzień ruskaj kultury, kali ŭ mierapryjemstvie lubym sposabam, naŭprost ci ŭskosna, budzie ŭdzielničać pasolstva Rasii.
«Ruskija i biełarusy mohuć vystupać z kancertami ŭ Vilni, tolki kali jany vyrazna i adkryta, publična zajaviać ab svajoj niazhodzie z režymami, jakija kirujuć u Rasii i Biełarusi. Maŭčańnia nie chopić. Pra tych, chto padtrymlivaje režym, ja navat nie kažu — im adrazu ž prapanujuć iści tudy, kudy prapanavali pajści ruskamu vajskovamu karablu», — skazaŭ mer.
Šymašus abiacaje, što nieŭzabavie paviedamić i pra inšyja dziejańni ŭ pytańni zmahańnia z rasijskaj prapahandaj.
«Dobra, što my ŭžo raniej zrabili chatniuju pracu i prybrali savieckich bałvanoŭ ź Zialonaha mosta i pazbavilisia ad «Doma Maskvy».
Ciapier vydatny čas dla taho, kab ačyścicca ad śmiećcia rasijskaha režymu, pakinutaha ŭ našaj krainie. Zaklikaju da hetaha ŭsie litoŭskija harady i nacyjanalnyja ŭstanovy. Kali Ukraina z našaj dapamohaj pieramoža ŭ vajnie, my taksama budziem čyściejšymi i budziem dychać valniej», — napisaŭ kiraŭnik horada.
Mer Vilni zaklikaŭ taksama da infarmacyjnaj vajny — raskazvać rasijanam u sacyjalnych sietkach praŭdu, źniapraŭdžvać chłuśniu, jakuju raspaŭsiudžvaje režym. I hałoŭnaje — nie zabyvacca, što Pucin sprabuje nas zapałochać.
«Adzinaja zbroja dla baraćby z takim ahresaram (i Ukraina pakazvaje, jak heta dziejničaje) —- dać adpor. I dziakuj Bohu, što my ŭ NATA, što my mocnyja, i što nas niemahčyma pieramahčy. Słava Ukrajini!», — skončyŭ svoj post Šymašus.