Palicyja Ukrainy paćvierdziła vybuchi kala miažy ź Biełaruśsiu. Ale na ŭkrainskim baku
Ukrainskaja palicyja zaviała kryminalnyja spravy pa faktu avijaŭdaraŭ, naniesienych pa Rovienskaj vobłaści. Jany adbylisia ŭ toj čas, kali šerah ŚMI z padačy aficyjnych orhanaŭ Ukrainy paviedamili pra mahčymyja avijaŭdary pa vioskach na Stolinščynie, piša Radyjo Svaboda.
Pavodle paviedamleńnia palicyi, try vybuchi adbylisia ŭ 15.40 minskaha času ŭ poli kala vioski Milač Sarnienskaha rajona Rovienskaj vobłaści. U vyniku bambardavańnia nichto nie paciarpieŭ, ale była paškodžanaja linija elektrapieradač.
«Śledča-apieratyŭnaja hrupa RUUS № 1 (Dubrovica) zadakumientavała złačynstva: źviestki ŭniesienyja ŭ Adziny rejestr dasudovych rasśledavańniaŭ pa č. 2 st. 110 KK Ukrainy (zamach na terytaryjalnuju cełasnaść i niedatykalnaść Ukrainy). Materyjały kryminalnaj vytvorčaści buduć nakiravanyja ŭ SBU dla rasśledavańnia», — paviedamlaje palicyja.
Supracoŭniki palicyi i vyvieźli ź miesca zdareńnia abłomki dy vyznačyli pachodžańnie bojeprypasaŭ.
Vioska Milač znachodzicca za niekalkich kiłamietraŭ ad biełaruskaj vioski Kopani, dzie miascovyja žychary čuli huł samalotaŭ i hrukat. Ukrainskija ŭłady paviedamlali, što heta moh być pravakacyjny abstreł rasijskich piłotaŭ biełaruskaj terytoryi z metaj uciahnuć Biełaruś u vajnu z Ukrainaj. Minabarony Biełarusi zajaviła, što paviedamleńni pra abstreł biełaruskich viosak — fejk.