«Barsa» zdabyła ničyju ŭ Frankfurcie, «Romu» šakavaŭ «Bude-Hlimt». Vyniki čverćfinałaŭ Lihi Jeŭropy i Lihi Kanfieriencyj
Samaj hučnaj siensacyjaj čaćviarha ŭ mižnarodnych futbolnych kubkach stała spatykańnie ispanskaha hranda. Kamanda sa stalicy Katałonii nie zdoleła adužać niamiecki «Ajntracht» u pieršym čverćfinalnym matčy Lihi Jeŭropy.
Padnačalenyja Chavi nie skaralisia supiernikam ažno z 23 studzienia. Fota: Uefa.com
Kab zrazumieć, naskolki vydatny charaktar maje pośpiech kalektyva z Frankfurta, dastatkova adšukać datu apošniaj parazy «Barsiełony».
Padnačalenyja Chavi nie skaralisia supiernikam ažno z 23 studzienia — i pierad zmahańniem suprać «Ajntrachta» 13 matčaŭ zapar sychodzili z pola niepieramožanymi.
Adnak na hoł maładziona Knaŭfa, što zdaryŭsia na 49-j chvilinie, ispancy doŭhi čas adkazać nie zdoleli. Tolki na 66-j chvilinie Fieran Tores damohsia pośpiechu i praciahnuŭ vynikovuju sieryju kamandy. Bolš za miesiac «Barsa» minimum raz za sustreču «prabivała» bramnika apanientaŭ.
Hoł Knaŭfa nie dazvoliŭ «Barsiełonie» ŭziać vierch nad «Ajntrachtam». Fota: Uefa.com
Nie vyśvietlili pieramožcu i pradstaŭniki samaj rejtynhavaj pary. Italjanskaja «Atałanta» adnosna chutka zasmuciła niamiecki «Lejpcyh», dziakujučy vysiłkam Muryela. Adnak utrymać pieravahu nie zdoleła: Dzapakosta skiravaŭ miač va ŭłasnuju bramu praz 12 chvilin adnaŭleńnia hulni paśla pierapynku.
Nie skaryŭsia supiernikam i adziny francuzski kłub, što zastaŭsia ŭ Lizie Jeŭropy minimalna. Hoł Boŭena dazvoliŭ «Vest Chemu» atrymać pieravahu nad «Lijonam» na rodnaj arenie. Adnak Ndambiele na ekvatary druhoha tajma adnaviŭ raŭnavahu, jakaja i stała vynikovaj.
Tym nie mienš, anhličanie ničyju spraviadliva nazavuć pośpiecham, bo z-za vydaleńnia Kresueła ŭ dadadzieny čas pieršaha tajma jany pałovu sustrečy praviali ŭ mienšaści.
Trapny streł Džarada Boŭena. Fota: Uefa.com
Šatłandski «Rejndžers» minimalna paciarpieŭ u haściach ad partuhalskaj «Brahi» — i heta zrabiła tydzień horcaŭ uvohule minornym. Na vychodnych u derbi «staroj firmy» kamanda z Hłazha prajhrała ziemlakam z «Sełcika» 1:2. I namahałasia reabilitavacca. Adnak zrabić hetaha nie zdoleła.
U Lizie Kanfieriencyj, turniry pa ranhu nižejšym, samaj jarkaj hulnioj čverćfinała stała ničyja «Fiejenaorda» i «Słavii».
Kamandy sumarna zabili šeść hałoŭ, pryčym apošni abmien udarami adbyŭsia z 86-j pa 95-ju chviliny — spačatku adznačylisia hałandcy, a paśla druhi raz za viečar uratavalisia čechi.
Raterdam vidavočna budzie rasčaravany nie tolki vynikam, ale i dziejańniami ŭłasnaj abarony: usie try ŭdary pražan u stvor akazalisia halavymi.
Padzialili ački i «Lester» z PSV. Voś tolki tut, naadvarot, zaŭziatary nazirali samy sumny futboł viečara. Nivodzin z bakoŭ tak i nie prydumaŭ, jak zasmucić kipiera apanientaŭ.
Usio išło da mirnaha zychodu i ŭ zmahańni narviežskaha «Bude-Hlimta» dy italjanskaj «Romy» — na hodnuju halavuju akcyju Krystante adkazaŭ Sałtnes. Adnak naprykancy matča efiektnyja dziejańni Vietlesena schilili šali ŭ bok skandynavaŭ.
«Roma» nie zdoleła prystasavacca da štučnaha narviežskaha hazonu. Fota: Uefa.com
Tym nie mienš, ciažkaści italjancaŭ byli pradkazalnyja: štučny hazon na stadyjonie «Bude-Hlimta» jašče z vosieni pieratvaryŭsia ŭ sapraŭdnaje vyprabavańnie dla luboj kamandy, jakaja zavitvaje pad palarnaje koła.
Jašče adnym pieramožcam u čaćvier u Lizie Kanfierencyj staŭ «Marsel». Hoł-pryhažun Dzimitry Pajieta dazvoliŭ francuzam davieści svaju pieravahu nad hrečaskim PAOKam, 2:1.