Trenier BATE: Niahledziačy na parazu, ja nie adčuvaju biazvychadnaści
«Niahledziačy na paražeńnie, ja nie adčuvaju biazvychadnaści», — zajaviŭ hałoŭny trenier barysaŭskaj kamandy BATE Viktar Hančarenka na paślamatčavaj pres‑kanfierencyi.
«Mnie ciažka papraknuć kamandu, — skazaŭ jon. — My dobra hulali na praciahu 90 chvilin i akazvali nacisk na sapiernika. Ale heta futboł — toj, chto mienš pamylajecca, toj i vyjhraje».
«Ale ŭ nas jašče jość 90 chvilin, kab vypravić situacyju, — skazaŭ Hančarenka, majučy na ŭvazie matč u adkaz. — My mocnyja ducham i jašče pazmahajemsia za vychad u hrupavy raund Lihi Jeŭropy».
U svaju čarhu hałoŭny trenier «Liteksa» Stanimir Staiłaŭ adznačyŭ važnaść pieramohi ŭ pieršym matčy plej‑of Lihi Jeŭropy. Razam z tym jon padkreśliŭ, što kamanda BATE hulała lepš. «Svajoj kamandzie za hulniu ja b pastaviŭ try bały pa piacibalnaj sistemie, i toje — tolki z‑za pieramohi», — skazaŭ Staiłaŭ.
Pavodle słoŭ treniera «Liteksa», jaho kamanda rabiła šmat pamyłak. «BATE prymusiła hulać nas u abaronie. Ale my čakali svajho šancu, i dobra, što my jaho dačakalisia», — reziumavaŭ Staiłaŭ. «Kali kamanda hulaje lepš, heta nie značyć, što jana moža vyjhrać», — padkreśliŭ jon.
Niahledziačy na atrymanuju pieramohu, Staiłaŭ aceńvaje šancy dźviuch kamand na vychad u hrupavy raund Lihi Jeŭropy «50 na 50».
«U nas napieradzie druhaja hulnia, u jakoj my pavinny zhulać bolš ahresiŭna jak haspadary», — zajaviŭ hałoŭny trenier bałharskaj kamandy.
Jak paviedamlałasia raniej, u pieršym matčy plej‑of Lihi Jeŭropy barysaŭski BATE na svaim poli prajhraŭ bałharskamu «Liteksu» ź likam 0:1.