Łukašenka płanuje vizit va Ukrainu
Taksama nie vyklučany sioleta pryjezd Viktara Juščanki ŭ Biełaruś.
Da kanca hetaha hoda płanujecca aficyjny vizit Alaksandra Łukašenki va Ukrainu, paviedamiŭ pasoł Ukrainy ŭ Biełarusi Ihar Lichavy 21 žniŭnia na pres‑kanfierencyi ŭ Minsku.
«Nie mahu nazvać dakładnuju datu, ale my rychtujemsia da aficyjnaha vizitu biełaruskaha prezidenta. Treba vyrašyć šerah pytańniaŭ», — skazaŭ pasoł.
Lichavy taksama nie vyklučyŭ, što sioleta moža adbycca vizit prezidenta Ukrainy Viktara Juščanki ŭ Biełaruś.
Adpaviednaje zaprašeńnie biełaruskaha boku atrymana prezidentam Ukrainy, paviedamiŭ dypłamat.
Lichavy nahadaŭ, što prezidenty Łukašenka i Juščanka ŭžo dvojčy sustrakalisia na praciahu hetaha hoda. «Kantakty na vyšejšym uzroŭni buduć praciahvacca», — skazaŭ jon.