Za źniaćciom rekłamy «Biełaruskaje — samaje majo» staić Natalla Piatkievič
abnoŭlena, dapoŭniena
Pradstaŭniki Minharvykankama prymušajuć apierataraŭ vonkavaj rekłamy źniać biłbordy «Biełaruskaje — samaje majo». Pradstaŭniki Asacyjacyi rekłamnych arhanizacyj u nieŭrazumieńni, ale vykonvajuć «pažadańnie».
Pradstaŭniki Minharvykankama prymušajuć apierataraŭ vonkavaj rekłamy źniać biłbordy «Biełaruskaje — samaje majo». Pradstaŭniki Asacyjacyi rekłamnych arhanizacyj u nieŭrazumieńni, ale vykonvajuć «pažadańnie».
Upraŭleńni ideałohii i handlu Minskaha harvykankamu stajać na vušach. Z samaha vierchu im dali pa šapcy za biłbordy «Biełaruskaje — samaje majo». Pavodle čutak, što chodziać u čynavienskich kalidorach, zahad razabracca dali niepasredna z Administracyi prezidenta. Tam za ideałohiju adkazvaje Natalla Piatkievič — namieśnica kiraŭnika Administracyi.Rekłama na biełaruskaj movie mieła spryjać prodažu biełaruskich tavaraŭ, ale jaje paličyli «zanadta nacyjanalistyčnaj». Biłbordy byli vykananyja na biełaruskaj movie. Ułasna, fihuravali ŭsiaho čatyry słovy: «Biełaruskaje — samaje majo» i «Dziakuj» pad štrych-kodam. Plus stylizavany arnamient, u jakim vykarystoŭvałasia vaśmikancovaja zorka z tradycyjnaj vyšyŭki. Bieła-čyrvona-zialonaja hama, u jakoj byli vytrymanyja biłbordy, nie ŭratavała. Zanadta honaru pabačyli, imavierna, u farmuloŭcy: «Samaje majo».
Ideołahi z harvykankamu ŭžo zuby źjeli na vyjaŭleńni ideałahičnych dyviersij. Źmiest usioj haradskoj rekłamy, navat na stendach u mietro, uzhadniajecca ź ideałahičnym adździełam. U suviazi z hetym rekłamu niezaležnych ŚMI paprostu nie dazvalali. Nie prapuścili navat mizernuju abviestačku «Našaj Nivy» pamieram 10 na 10 santymietraŭ ab tym, što hazieta viarnułasia ŭ prodaž u šapikach «Biełsajuzdruku». Aficyjnym adkazam u razhar kryzisu zaŭždy było kryvadušnaje «Adsutničajuć svabodnyja płoščy».
Tak što apošni raznos uraziŭ navat ich. Upraŭleńniam handlu, pasłuh i ideałohii zahadana pilnaść padvoić. U suviazi z hetym ideołahi ciapier vyvučajuć na «nacyjanalistyčnaść» źmiest inšaj biełaruskamoŭnaj rekłamy.
«Zrazumieła, što niešta adbyvajecca, ale što — nichto ničoha nie viedaje» — paviedamlaje marketing.by.
Farmalna čynoŭniki abvinavacili rekłamistaŭ u nieprafiesijanaliźmie i biednaści idej.
Čyja b karova myčała...
Pradstaŭniki Asacyjacyi rekłamnych arhanizacyj skazali «NN», što «nam nie zabaranili, nas paprasili źniać rekłamu. U Minsku stajała kala 60 vyjavaŭ. Učora i siońnia ich užo aktyŭna zdymajuć. Bolej nijakaj infarmacyi my dać nie možam, bo sami jaje nie majem. Usie pytańni da Ministerstva handlu».
Jak raniej paviedamlaŭ «Našaj Nivie» Ihar Samkin, dyrektar Asacyjacyi rekłamnych arhanizacyj Biełarusi, ideja rekłamy «Biełaruskaje samaje majo» naradziłasia padčas razmovy z pradstaŭnikami Ministerstva handlu.
Raspracavali «Biełaruskaje — samaje majo» dyzajniery siabroŭ Asacyjacyi rekłamnych arhanizacyj.
U Minsku stajała kala 60 biłbordaŭ. Usio heta zroblena na dobraachvotnych pačatkach. U akcyi ŭdzielničali čatyry kampanii: «Kołarekspres», «Bih Bord», «Bahiema» i «Praśpiektpres».
...«O, jak daloka nam jašče da Biełarusi», — tak pisaŭ kłasik.