Zahnuli canu, a ciapier raspłačvajemsia
Biełaruś budzie pastaŭlać uhnajeńni ŭ Kitaj «na ŭzajemaprymalnych umovach», zajaviŭ vice-premjer.
Biełaruś budzie pastaŭlać uhnajeńni ŭ Kitaj «na ŭzajemaprymalnych umovach», zajaviŭ vice-premjer.
Biełaruskaja kalijnaja kampanija (BKK) zaklučyła kantrakt z Kitajem – adnym z hałoŭnym imparcioraŭ našaj syraviny. Vystupajučy ŭ aŭtorak pierad biełaruskimi dyplamatami, pieršy namieśnik premjer-ministra Ŭładzimier Siamaška zajaviŭ, što dakument padpisany «na ŭzajemaprymalnych umovach», a zaplanavanyja abjomy ekspartu ŭhnajeńniaŭ pa vynikach hodu buduć vykananyja. Adnak hetyja śćvierdžańni vice-premjera vyklikajuć sumnievy. Zhodna z novym kantraktam, abjom pradadzienaj u Kitaj pradukcyi składzie 1,7 młn ton uhnajeńniaŭ, što mieniej, čym u 2005 h., kali było pradadziena 2 młn ton.
Što da cany, to vice-premjer jaje nie nazvaŭ. Admaŭlajecca ad kamentaroŭ i BKK. Internet-hazeta «Salidarnaść» maje źviestki, što pradstaŭniki Kitaju syšlisia na canie 190 dalaraŭ za tonu. Šmat heta ci mała? Adkazać na hetaje pytańnie niaprosta, piša gazetaby.com. Sprava ŭ tym, što handal uhnajeńniami, jak i mnohija inšyja sfery dziejnaści ŭ našaj dziaržavie, ciažka nazvać prazrystym. Adny krynicy śćviardžajuć, što letaś Biełaruś addavała pradukcyju pa 165 dalaraŭ za tonu, a na pačatku pieramovaŭ menedžery BKK raźličvali padniać cana da 205. Druhija kažuć, što raniej pradavali pa 210, a chacieli – pa 240–245 dalaraŭ za tonu.
Letaś miesiačnyja pastaŭki składali kala 650 tysiač ton. Apošnija ž niekalki miesiacaŭ hetaha hodu «Biełaruśkalij» pradavaŭ tolki pad 300 tysiač ton uhnajeńniaŭ za miesiac. U vyniku kraina moža niedaatrymać valutu. Letaś dachod ad prodažu kalijnych uhnajeńniaŭ skłaŭ kala miljarda dalaraŭ.
Fota Andreja Lankieviča