Navat miesca pad namiot nialohka znajści. Što robicca z arendaj žylla ŭ Brasłavie pierad fiestyvalem Viva Braslav
Praz dva tydni nasielnictva cichaha ŭtulnaha Brasłava pavialičycca ŭ piać razoŭ. Na plažy voziera Dryviaty 29-30 lipienia budzie hrymieć ledź nie adziny muzyčny fest, jaki zastaŭsia sioleta ŭ žyvych — Viva Braslav. Ci možna jašče źniać žyllo na Brasłavach i kolki heta budzie kaštavać, daviedaŭsia realt.by.
«U radyusie 25 kiłamietraŭ ad centra vy ŭžo naŭrad ci niešta znojdziecie»
Svaje varyjanty raźmiaščeńnia prapanujuć sami arhanizatary fiestyvalu. Hości «Vivy» jašče niadaŭna mahli zabraniravać «bunhała» (paŭnavartasny numar u hateli na dvaich sa śniadankami) za 1690 rubloŭ za 3 nočy, «hłempinh Luxury» (karkasny domik na dvaich sa spalnymi miescami i razietkami) za 990 rubloŭ i «hłempinh kamfort» (draŭlanaja chatka na 4-ch z razietkami) za 690 rubloŭ.
Ale ciapier dastupnymi da braniravańnia zastajucca tolki miescy ŭ namiotavym łahiery. Pryčym pałatku treba pryvozić z saboj. Bilet u kempinh (u košt uvachodzić miesca pad pałatku, dušavyja, tualety, zona barbiekiu i mahčymaść padzaradzić telefon) kaštuje 49,9 rubla na adnaho za 3 nočy.
Kali ž chočacca čahości bolš kamfortnaha, čym namiot — pryjdziecca papracavać. Samyja vopytnyja fiestyvalščyki pačynajuć braniravać žyllo ledź nie za hod.
Adkryvajem katałoh damoŭ u arendu i telefanujem ŭ pieršuju pa śpisie siadzibu. Haspadar Viktar ź pieršych ža chvilin zasmučaje:
— Rabiaty, usio daŭno zabraniravana, pieradapłaty atrymanyja, čakajem hetych chulihanaŭ (śmiajecca). Kab dakładna patrapić u patrebny abjekt raźmiaščeńnia, treba braniravać za hod. U mianie ŭ najaŭnaści roznyja damy, jość na 7-8 čałaviek, ale ŭ dni fiestyvalu tudy zasialajecca i ŭ dva razy bolš — popyt zaškalvaje.
Na jaho dumku, u radyusie 25 kiłamietraŭ ad centralnaj łakacyi naŭrad ci niešta mahčyma znajści.
— Ciapier narod šukaje ŭžo nie damy, a chacia b miescy pad namioty, — kaža pradprymalnik.
Jašče niekalki sprobaŭ dajuć taki ž vynik: «Miescaŭ niama, usio zabraniravana daŭno».
Navat u siadzibie na voziery Bohina za 35 kiłamietraŭ ad fiestyvalnaha ruchu adkazali admovaj.
— Usie miescy z kryvioju vydrali jašče miesiac tamu. Narod trajnuju canu hatovy davać — tolki raźmiaścicie. Ničoha ŭžo niama.
Toje samaje z pasutačnymi kvaterami. Haspadary adnapakajovaj kvatery ŭ piacipaviarchoviku ź vidam na aziory (130 rubloŭ za sutki) kapsłakom paviedamlajuć: «Pavažanyja hości! Na «Viva Brasłaŭ» usio zabraniravana!».
— Na žal, užo ničoha niama. Pieršyja braniroŭki ludzi rabili jašče ŭ studzieni. Ciapier volnaha žylla niama ni ŭ karpusach, ni ŭ chatkach, — adkazali ŭ adździele braniravańnia Nacyjanalnaha parka.
Volnyja miescy (nie ŭ numarach, a pad namioty) udałosia znajści tolki ŭ adnoj z tematyčnych supolnaściaŭ u Telehramie. Naprykład, za 27 kiłamietraŭ ad Brasłava, na bierazie nievialikaha malaŭničaha voziera ŭ vioscy Murmiški za 20 rubloŭ na sutki možna raźmiaścić svaju pałatku, a ŭ dadatak atrymać altanku, bijatualet, manhał, łaźniu i ćviarozaha vadziciela.
Jašče adzin varyjant —miesca pad namiot prama ŭ Brasłavie na pryvatnaj terytoryi. Košt — 30-50 rubloŭ na sutki za kampaniju, jość altanka, tualet, manhał i łaźnia. Atrymlivajecca, nie daražej, čym u kempinhu na feście, ale spakajniej.
«Bolš za ŭsich na «Vivie» zarablajuć nie miascovyja žychary, a brasłaŭski «Jeŭraopt»
Julija Abraziej razam ź siamjoj pierajechała ź Minska ŭ Brasłaŭski rajon kala 8 hadoŭ tamu. Za hety čas jana paśpieła stać ułaśnicaj niekalkich zakinutych abjektaŭ, pabyć haspadyniaj kaviarni «Kaviarnia» i dobra vyvučyć miascovyja realii:
— Kali ščyra, dla žycharoŭ Brasłava fiestyval — heta vielmi ciažkaje vyprabavańnie. Dzieviacitysiačny horad kateharyčna nie hatovy da pryjomu 40-50 tysiač haściej. Tak, arhanizatary namahajucca, robiać svoj namiotavy łahier, ale situacyju heta nie ratuje. Samyja razumnyja i chitryja pačynajuć braniravać žyllo jašče ŭ śniežni-studzieni. Pry hetym treba razumieć, što na fiestyval pryjazdžajuć nie tyja ludzi, jakija hatovyja žyć u «kuratnikach». Heta nie saviecki turyst, jaki hatovy zdymać choć chleŭ, aby ŭbačyć voziera-mora. Na fest pryjazdžaje moładź, tak by mović, «z pantami».
Jak raskazvaje Julija, siaredniaja cana na žyllo hetymi dniami — 100 rubloŭ na čałavieka. U zvyčajnyja ž časy pražyvańnie ŭ Brasłavie ŭ damku z abstanoŭkaj biez vynachodstvaŭ abychodzicca ŭ 25-30 rubloŭ za čałavieka. Padčas fiestyvalu košt brasłaŭskaha «standartu» moža vyraści ŭ 2-3 razy ŭ zaležnaści ad fantazii i nachabstva haspadaroŭ.
Jaje parada — źviarnucca da nie samych vidavočnych varyjantaŭ. Da prykładu, jość małaviadomaja haścinica muzieja «Zajazny Dvor» (u minułyja hady tam byli miescy navat padčas fiestyvalu), jość haścinica DTSAAF, jość plaž Akademii fizvychavańnia (tam možna arandavać miesca pad pałatku).
Jašče varyjant — prama na anłajn-kartach vyhladać damy ź vialikimi palankami, šukać uładalnikaŭ i naŭprost damaŭlacca, kab dazvolili pastavić namiot u dvary. Albo — pryjechać i šukać načleh prosta na miescy. Varyjant «pachadzić pa horadzie» taksama pracuje.
− Miascovyja žychary rady takomu našeściu turystaŭ?
− Mnohija haspadary naohuł nie zdajuć žyllo na čas «Vivy». Historyi, pra toje, što chtości zdaŭ kvateru, a jaje razhramili — heta nie vydumki. Niekatoryja brasłaŭčanie ŭvohule imknucca źjechać na hety čas. Asabista my pierajazdžali ŭ hety kraj za cišynioj i spakojem, a padčas festu tut tak hrukoča, što žach — u mianie sabaki vyjuć, nie pierastajučy. Muzyku čuvać navat za 7 kiłamietraŭ! U cełym, fiestyval nahadvaje tarnada, jaki prosta treba pieražyć.
My ŭ hetyja dni ŭ horad starajemsia naohuł nie savacca — zakuplajemsia praduktami zahadzia.
Pracujučy ŭ kafe, ja za hetyja hady nahladziełasia ŭsiakaha. Bačyła i złamanyja nohi, i raźbityja hałovy. Moładź pryjazdžaje adarvacca, błukaje pa dvarach, vytoptvaje kłumby, abryvaje ahurki. Ja razumieju, jany adpačyvajuć, ale tarmazoŭ u ich časam zusim niama. Naohuł, pa maich adčuvańniach, bolš za ŭsich na «Vivie» zarablajuć nie miascovyja žychary, a brasłaŭski «Jeŭraopt». Ja nie suprać fiestyvalu, heta — dobraja sprava, ale niachaj by jon pierajechaŭ z horada na jaki-niebudź Majak (hara za 15 kiłamietraŭ ad Brasłava). Tam mała nasielenych punktaŭ, jość vydatnyja palany, niachaj hrymiać u zadavalnieńnie.