Dadrukavalisia
Asudžana hrupa rabotnikaŭ drukarniaŭ i pradpryjemstvaŭ Dziaržznaku.
Sudy Barysaŭskaha rajona Minskaj vobłaści i Kastryčnickaha rajona Mahilova prysudzili «da roznych vidaŭ pakarańnia» ŭdzielnikaŭ złačynnaj hrupy, u skład jakoj uvachodzili rabotniki drukarniaŭ i pradpryjemstvaŭ Dziaržznaku.
Jak paviedamiŭ Centr infarmacyi i hramadskich suviaziaŭ KDB, jany zajmalisia niezakonnaj realizacyjaj dublikataŭ błankaŭ tavarna‑transpartnych nakładnych, a taksama kantrolnych marak, što vykarystoŭvajucca dla naniasieńnia na ŭpakoŭku tavaraŭ narodnaha spažyvańnia.
U chodzie pravierki infarmacyi ab najaŭnaści ŭstojlivych kanałaŭ pastupleńnia i ŭciahvańnia ŭ cieniavy abarot dublikataŭ błankaŭ tavarna‑transpartnych nakładnych (identyčnych pa markiroŭcy ŭžo vypuščanym u abaračeńnie), vyrablenych na pradpryjemstvach Dziaržznaku, KDB ustanaviŭ fakty vykarystańnia padrobnych błankaŭ strohaj spravazdačnaści dla arhanizacyi i prykryćcia cieniavych finansavych schiem i dziejnaści łžepradprymalnickich struktur.
Z sankcyi prakuratury była praviedziena pravieračnaja zakupka partyi padroblenych tavarna‑transpartnych nakładnych. U chodzie praviadzieńnia ździełki pa kupli‑prodažy ŭdzielniki złačynnaj hrupy byli zatrymanyja supracoŭnikami KDB.
U dačynieńni da ŭdzielnikaŭ złačynnaj hrupy KDB jak orhan daznańnia raspačaŭ try spravy pa art. 380 KK (padrobka, vyrab, vykarystańnie abo zbyt padroblenych dakumientaŭ, štampaŭ, piačatak, błankaŭ), pieradadzienych potym u Hienieralnuju prakuraturu, a zatym u orhany MUS dla dalejšaha rasśledavańnia. U chodzie sudovaha razboru vina nazvanych asob «była całkam dakazanaja».
Artykuł 380 KK dla hrupy asob, jakija ŭčynili złačynstva pa papiaredniaj zmovie, praduhledžvaje pakarańnie ŭ vyhladzie štrafu, abo aryštu na termin ad troch da šaści miesiacaŭ, abo abmiežavańnia voli na termin da piaci hadoŭ, abo pazbaŭleńnia voli na termin da troch hadoŭ.