Biełaruski dziaržaŭny maładziožny teatr adkryvaje siezon
U aŭtorak, 22 vieraśnia, na scenie małoj zały Pałaca Respubliki dajuć «Tarciufa» pavodle Maljera.
Biełaruski dziaržaŭny maładziožny teatr 22 vieraśnia adkryvaje 25‑y siezon. Na scenie małoj zały Pałaca Respubliki projdzie pakaz kamiedyi «Tarciuf» pavodle pjesy Maljera.
Jak paviedamiła kiraŭnik litaraturna‑dramatyčnaj častki teatra Ksienija Kniazieva, aŭtary pastanoŭki raskryvajuć viadomy siužet kamiedyi ŭ sučasnaj formie. Režysior śpiektakla — Madest Abramaŭ, mastak‑pastanoŭščyk — Alaksandr Kaściučenka.
Taksama, pavodle jaje słoŭ, u hetym miesiacy teatr pradstavić publicy inšyja kamiedyi: 28 vieraśnia — śpiektakl «Karjera Čalaścina» Alda Nikałai, 29 vieraśnia — «Kachańnie ŭtraich» (A.Kurbski, M.Bierkje‑Maryńje).
Pakazy projduć na scenie staličnaha kłuba imia Dziaržynskaha.
U pačatku listapada teatr rychtuje premjeru — pastanoŭku pavodle dramy Rustama Ibrahimbiekava «Dotyk» u režysury Abramava i scenahrafičnym afarmleńni Kaściučenki. Śpiektakl prymierkavany da 65‑hodździa vyzvaleńnia Biełarusi ad niamiecka‑fašysckich zachopnikaŭ. U pastanoŭcy zaniatyja jak viadomyja publicy, tak i maładyja akciory: Vasil Sušycki, Kanstancin Michalenka, Śviatłana Husarava, Anastasija Sałaŭjova, Dzianis Majsiejčyk, Siarhiej Ždan, Dźmitryj Bojka.
Z krasavika hetaha hoda budynak Biełaruskaha dziaržaŭnaha maładziožnaha teatra zakryty na rekanstrukcyju. U budynku płanujecca pašyryć scenu i kalasceničnuju prastoru, zamianić abstalavańnie, zrabić prybudovy, jakija istotna pavialičać karysnuju płošču. Teatr praciahvaje svaju rabotu na teatralnych placoŭkach Minska i inšych haradoŭ krainy.