«Trajpł» atrymaŭ utulnaje miesca pad zabudovu žylla ŭ Minsku ŭ abmien na Ladovy pałac
Novy kryty katok płanujecca pabudavać na praśpiekcie Dziaržynskaha, žyły masiŭ — u centry na Staražoŭskaj.
TAA «Trajpł» atrymała mahčymaść pabudavać žyły masiŭ va ŭtulnym rajonie Minska, na vulicy Staražoŭskaj, u abmien na zhodu padaryć horadu novy kryty katok na praśpiekcie Dziaržynskaha.
Budaŭnictva koŭzanki, jakaja ŭklučaje dźvie ladovyja placoŭki, arenu z trybunami dla hledačoŭ, pole dla vučebna‑trenirovačnych zaniatkaŭ, zał fitniesu, trenažornyja zał i inšyja pamiaškańni, pavinna być zavieršana ŭ 2011 hodzie.
«… Prajektavańnie i budaŭnictva abjekta ažyćciaŭlajucca … za košt ułasnych srodkaŭ … z nastupnaj biazvypłatnaj pieradačaj abjekta i źviazanaj ź im majomaści … ŭ kamunalnuju ŭłasnaść h. Minska nie paźniej čym praz try miesiacy paśla ŭvodu abjekta (katka) u ekspłuatacyju», — havorycca va ŭkazie № 460 ad 17 vieraśnia.
Za padarunak horadu «Trajpł» atrymaje nie tolki prava zabudovy na vuł. Staražoŭskaj, ale i budzie vyzvaleny ad vypłaty kampiensacyi koštu žylla, pryznačanaha pad znos ŭ miescy budučaj zabudovy.
«Rekamiendavać Minskamu haradskomu savietu deputataŭ vyzvalić … «Trajpł» ad pieraličeńnia ŭ biudžet h. Minska sumaŭ kampiensacyj koštu žyłych pamiaškańniaŭ, raźmieščanych u žyłych damach, pryznačanych pad znos u suviazi z pradastaŭleńniem jamu ziamielnaha ŭčastka dla budaŭnictva žyłoha kompleksu z ubudavanymi administracyjnymi i handlovymi pamiaškańniami, haražom‑stajankaj pa vuł. Staražoŭskaj, albo biazvypłatnaj pieradačy ŭ kamunalnuju ŭłasnaść h. Minska žyłych pamiaškańniaŭ, pryznačanych dla pierasialeńnia hramadzian z žyłych damoŭ, jakija padlahajuć znosu ŭ suviazi z pradastaŭleńniem ziamielnaha ŭčastka dla nazvanaj mety», — havorycca ŭ dakumiencie.
Ukazam taksama prapisanyja standartnyja ilhoty, jakija pradastaŭlajucca inviestaram pry budaŭnictvie žyłych i kamiercyjnych pamiaškańniaŭ u Minsku.