Dzikich žyvioł na darohach buduć pałochać «voŭčymi vačyma»
DAI sumiesna z departamientam «Biełaŭtadar» Ministerstva transpartu i kamunikacyj majuć namier zrabić zachady da źnižeńnia kolkaści darožna‑transpartnych zdareńniaŭ z najezdam na dzikich žyvioł u ciomny čas sutak.
Dziaržaŭtainśpiekcyja MUS Biełarusi sumiesna z departamientam «Biełaŭtadar» Ministerstva transpartu i kamunikacyj majuć namier zrabić zachady da źnižeńnia kolkaści darožna‑transpartnych zdareńniaŭ z najezdam na dzikich žyvioł u ciomny čas sutak.
Pry hetym budzie vykarystany dośvied skandynaŭskich krain.
Jak paviedamiŭ na pres‑kanfierencyi 21 vieraśnia načalnik adździeła arhanizacyi darožnaha ruchu i darožnaj inśpiekcyi UDAI MUS Juryj Trajan,
na viadomych učastkach daroh praz peŭnuju adlehłaść płanujecca ŭstanavić słupki, abstalavanyja śpiecyjalnymi adbivalnikami, jakija pavaročvajuć śviatło far aŭtamabilaŭ na 90 hradusaŭ: ad darohi — u les. Hetyja prystasavańni nazyvajucca «voŭčymi vačyma».
Dzikija žyvioły, jakija sprabujuć vyjści ź lesu na śviatło, bačać, jak śćviardžajuć śpiecyjalisty, voŭčyja vočy, što pavinna ich adpužvać ad aŭtatras.
Pavodle infarmacyi Juryja Trajana, u 2007 hodzie ŭ vyniku DTZ z najezdam na dzikich žyvioł u Biełarusi try čałavieki zahinuli i 38 atrymali traŭmy. U 2008 hodzie hetyja pakazčyki byli šeść i 44 adpaviedna.
Raskazvajučy ab inšych nou‑chau, zaklikanych pavysić biaśpieku darožnaha ruchu, pradstaŭnik DAI ŭ pieršuju čarhu źviarnuŭ uvahu na toje, što ŭ Biełarusi ŭ apošnija hady aŭtadarohi prakładvajucca ŭ abychod nasielenych punktaŭ z abstalavańniem piešachodnych pierachodaŭ na roznych uzroŭniach. Heta adnosicca da takich daroh, jak Minsk — Maładziečna, Minsk — Miadziel, Minsk — Mahiloŭ, Minsk — Homiel.
Navinka 2009 hoda — abstalavańnie infarmatyŭnych piešachodnych pierachodaŭ, astraŭkoŭ biaśpieki na šerahu vulic i praśpiektaŭ u Minsku: Vaniejeva, Kłary Cetkin, Taškienckaj, Arłoŭskaj, Mašerava. A taksama abstalavańnie piešachodnaha pierachodu na 54‑m kiłamietry aŭtadarohi Minsk — Homiel, jaki bačny vadzicielam praktyčna za 1.000 mietraŭ. Jašče vosiem takich abjektaŭ budzie pabudavana da kanca vieraśnia. Dla padśvietki pierachodaŭ vykarystoŭvajucca ŭ tym liku soniečnyja batarei, u pierśpiektyvie — vykarystańnie elektraenierhii, jakaja vypracoŭvajecca vietranymi hienieratarami.