Maładafrontaŭca Cianiutu adpravili słužyć u transpartnyja vojski
Homielski aktyvist mižnarodnaj maładziožnaj arhanizacyi «Małady front» Andrej Cianiuta 25 vieraśnia budzie nakiravany na vajennuju słužbu ŭ transpartnyja vojski ŭ Žłobin.
Pra heta aktyvist daviedaŭsia 22 vieraśnia ŭ haradskim vajenkamacie. Jak zajaviŭ Cianiuta, svoj pryzyŭ u armiju jon ličyć niezakonnym.
«Miedkamisija nakiroŭvała mianie na abśledavańnie ŭ balnicu, dzie daktary pryznali, što ja nie pryhodny da słužby z‑za vysokaj stupieni skalijozu. Ale potym vajenkamat nakiravaŭ mianie ŭ inšuju miedustanovu, i tam užo niejak atrymałasia, što ja staŭ pryhodny», — skazaŭ aktyvist.
Cianiuta źviartaŭsia ŭ sud Savieckaha rajona Homiela z prośbaj prypynić svoj pryzyŭ, pakul nie budzie paćvierdžana zakonnaść jaho adličeńnia z Branskaj sielskahaspadarčaj akademii. Zajavu nakont hetaha aktyvist adpraŭlaŭ u Ministerstva adukacyi Rasii, ale list byŭ pieraadrasavany ŭ akademiju. Adtul adkaz pakul nie pastupaŭ. 22 vieraśnia Cianiuta atrymaŭ paviedamleńnie z suda, što jaho isk da vajenkamata nakont prypynieńnia pryzyvu adchileny.
Akramia taho, aktyvist prasiŭ vajenkamat nakiravać jaho na alternatyŭnuju słužbu, ale prośba nie była zadavolenaja.
Sa studzienia 2008‑ha pa lipień 2009 hoda ŭ transpartnych vojskach u Žłobinie prachodziŭ vajennuju słužbu člen Partyi BNF, homielski aktyvist apazicyi Źmicier Žaleźničenka.