«Adcieńnie niekatoraj kinaekzotyki budzie prysutničać». Zamiest halivudskich filmaŭ rasijanam buduć pakazvać azijackija
Maskoŭskija kinateatry paśla sychodu halivudskich studyj z Rasii ŭ znak pratestu suprać vajennaj ahresii va Ukrainie pačnuć papaŭniać niedachop zachodnich filmaŭ karcinami z Paŭdniovaj Karei, Indyi, Turcyi, Kitaja i inšych krain. Pra heta paviedamiła hienieralny dyrektar «Moskino» Natalla Makryckaja.
«Viadoma, roźnicu mientalitetaŭ nichto nie admianiaŭ, i adcieńnie niekatoraj kinaekzotyki budzie prysutničać, ale pracavać u hetym kirunku treba abaviazkova», — skazała kinačynoŭnica.
Kiraŭniki kinateatraŭ užo zajaŭlali pra płany pakazvać stužki z Balivuda i Paŭdniovaj Karei. Adnak pieraaryjentavańnie na kantent ź Indyi, Kitaja, Karei, Łacinskaj Amieryki, pa-pieršaje, zojmie čas da paŭhoda na dublaž, zaklučeńnie damoŭ i rekłamu, a pa-druhoje, patencyjnyja čakańni cikavaści da ŭsiaho hetaha hledačoŭ składajuć, pavodle acenak, nie bolš za 8%.
Adsutnaść halivudskich karcin u rasijskim prakacie pryviała da taho, što da siaredziny krasavika začyniłasia bolš za tracinu (36,4%) kinazałaŭ u krainie. Čakajecca, što da kanca hoda ahulnyja straty kinateatraŭ biez zamiežnych błokbastaraŭ składuć 11,1 młrd rasijskich rubloŭ.