«Ruski dom u Minsku» ŭziaŭsia vučyć biełaruskich nastaŭnikaŭ «pravilnaj» historyi
24 žniŭnia ŭ Domie Maskvy ŭ Minsku adbyłasia mietadyčnaja siekcyja nastaŭnikaŭ historyi i hramadaznaŭstva ŭstanoŭ ahulnaj siaredniaj adukacyi horada Minska. Arhanizataram mierapryjemstva vystupiŭ «Ruski dom u Minsku» pad dacham Minskaha haradskoha instytuta raźvićcia adukacyi, piša Mayday.team.
Dom Maskvy ŭ Minsku. Fota ilustratyŭnaje
Aficyjna ŭ ramkach hetaj siekcyi nastaŭniki siarednich škoł pavinny byli abmierkavać asablivaści vykładańnia historyi ŭ sučasnych umovach i aśpiekty pavyšeńnia ŭzroŭniu prafiesijnaj kampietentnaści piedahohaŭ. Ale pačałosia mierapryjemstva z vystavy «Piotr Pieršy — stvareńnie rehularnaha vajenna-marskoha fłotu», prymierkavanaj da 350-hodździa cara Piatra I.
Pierad nastaŭnikami vystupiŭ vykanaŭca abaviazkaŭ kiraŭnika «Ruskaha doma ŭ Minsku» Michaił Bystroŭ. Na jaho dumku, važnaść pracy nastaŭnikaŭ historyi bačnaja mienavita ciapier, «kali padziei minułych hadoŭ pierapisvajucca pa palityčnaj voli, pomniki znosiać, a pamiać ścirajecca». Akurat u hety dzień biełaruskija ŭłady razburyli jašče adzin pomnik na miescy pachavańnia sałdat Armii Krajovaj u ŭ vioscy Surkanty Voranaŭskaha rajona, ale rasijski čynoŭnik mieŭ na ŭvazie jaŭna nie heta.
Na hetym «Ruski dom u Minsku» spyniacca nie źbirajecca, jon płanuje supracoŭničać ź Minskim haradskim instytutam raźvićcia adukacyi ŭvieś nastupny navučalny hod.