Čatyroch advakataŭ z Homielščyny pazbavili licenzij. Raniej jany abaraniali palitźniavolenych
6 vieraśnia kvalifikacyjnaja kamisija pa pytańniach advakackaj dziejnaści ŭ Biełarusi praviała pazačarhovuju atestacyju advakataŭ, u tym liku čaćviarych — z Homielskaj abłasnoj kalehii advakataŭ. Heta Hienadź Ułasienka (Mazyr), Taćciana Saŭčanka i Pavieł Kułažanka (Rečyca), a taksama Hanna Paŭluk (Homiel).
Advakaty Ułasienka i Paŭluk
Jak zajavili ŭ Ministerstvie justycyi Biełarusi, «padstavaj dla praviadzieńnia pazačarhovaj atestacyi pasłužyli fakty nienaležnaha vykanańnia advakatami svaich prafiesijnych abaviazkaŭ, vyjaŭlenyja Ministerstvam justycyi padčas vybaračnaj pravierki dziejnaści advakataŭ i jurydyčnych kansultacyj Homielskaj abłasnoj kalehii advakataŭ», paviedamlaje «Homielskaja viasna».
Pa vynikach pazačarhovaj atestacyi ŭ Miniuście paviedamili, što nibyta «padčas atestacyi asobnyja advakaty pakazali niezdavalniajučy ŭzrovień viedaŭ zakanadaŭstva, nieabchodny dla ažyćciaŭleńnia advakackaj dziejnaści, što śviedčyć pra ich niedastatkovuju kvalifikacyju».
Na hetaj padstavie pryniataje rašeńnie «ab niemahčymaści vykanańnia advakatami Ułasienkam, Kułažankam, Paŭluk, Saŭčanka svaich prafiesijnych abaviazkaŭ z pryčyny niedastatkovaj kvalifikacyi».
Takoje rašeńnie pryniataje niahledziačy na toje, što advakat Hanna Paŭluk, naprykład, maje bolš za 10 hadoŭ stažu raboty pa śpiecyjalnaści, źjaŭlajecca mahistram jurydyčnych navuk i vykładčycaj u HDU i HHMU. A advakatka Taćciana Saŭčanka maje bolš za 36 hadoŭ stažu pracy pa śpiecyjalnaści.