Ukraincy ŭźniali svaje ściahi ŭ pasiołku Kazačaja Łopań na poŭnačy Charkaŭščyny — na samaj miažy z Rasijaj
Miascovyja žychary ŭźniali ŭkrainskija ściahi ŭ pasiołku haradskoha typu z 5-tysiačnym nasielnictvam Kazačaja Łopań na poŭnačy Charkaŭščyny, na samaj miažy z Rasijaj. Heta zdaryłasia paśla adychodu rasijskich čaściej. Kazačaja Łopań była pad akupacyjaj z sakavika hetaha hoda.
Pryčyny rasijskaha adstupleńnia tut nie jasnyja, bo ŭkrainski nastup ad Kupianska ŭ kirunku Vaŭčanska adbyvajecca prykładna za 100 km adsiul na paŭdniovy ŭschod. Mahčyma, Rasii krytyčna brakuje siłaŭ, kab utrymać novy rubiež abarony pa Askole i Dancy, i Maskva vymušanaja pierakidvać tudy padmacavańnie, ahalajučy inšyja kirunki ŭ spadziavańni, što ŭkrainskija vojski ŭsio adno nie buduć pierachodzić dziaržaŭnuju miažu.
Na mapie — front u acency rasijskaha frantavoha błohiera «Rybaria» pa stanie na abied 11 vieraśnia. Kirunki adstupleńnia z Kazačaj Łopani i Vialikich Prachodaŭ paznačanyja čyrvonymi strełkami, jakija viaduć na terytoryju Rasii. Infarmavany błohier paznačaje terytoryju ad Hurjevaha Kazačka pad samy Vaŭčansk jak užo pakinutuju rasijskimi vojskami.