Aun San Su Čžy atrymała jašče try hady turmy. Ciapier jana pavinna adsiedzieć 26 hadoŭ
Byłaja lidarka Mjanmy i łaŭreatka Nobieleŭskaj premii miru Aun San Su Čžy asudžanaja da troch hadoŭ pazbaŭleńnia voli pa abvinavačvańni ŭ karupcyi. Raniej padkantrolnyja vajskoŭcam sudy krainy pryznali jaje vinavataj jašče ŭ niekalkich złačynstvach, i z ulikam apošniaha prysudu jaje ahulny turemny termin ciapier składaje 26 hadoŭ, piša «Bi-bi-si».
Aun San Su Čžy, jakoj ciapier 77 hadoŭ, była ŭziataja pad vartu ŭ pieršy ž dzień vajennaha pieravarotu ŭ Mjanmie, ździejśnienaha ŭ lutym 2021 hoda. Ciapier jaje ŭtrymlivajuć u adzinočnaj kamiery ŭ stalicy krainy Niejpjido.
Vajskovyja ŭłady krainy abvinavacili jaje prynamsi ŭ 18 złačynstvach, u liku jakich chabarnictva, parušeńnie pravił praviadzieńnia vybaraŭ, niezakonnaje vałodańnie racyjami i parušeńnie abmiežavańniaŭ padčas pandemii. Ahułam jany mohuć abiarnucca maksimalnym turemnym terminam amal u 190 hadoŭ.
Apošni pa časie prysud źviazany z abvinavačvańniami Aun San Su Čžy ŭ atrymańni chabaraŭ ad biznesoŭca, paviedamiła ahienctvu «Rojters» nienazvanaja krynica. U vyniku jana atrymała dva trochhadovyja turemnyja terminy, jakija buduć iści paralelna.
Aun San Su Čžy ličyć vystaŭlenyja suprać jaje abvinavačvańni absurdnymi i admaŭlaje lubyja pravaparušeńni. Sudovyja pracesy suprać jaje prachodziać u zakrytym režymie. Prychilniki byłoj lidarki krainy nastojvajuć, što chunta zaklučyła jaje za kraty, kab pieraškodzić joj kali-niebudź znoŭ zajmacca palitykaj ci asprečvać uładu vajskoŭcaŭ.
Vajskoŭcy Mjanmy pakul nijak nie kamientavali situacyju. Režym śćviardžaje, što sudy ŭ krainie niezaležnyja, i ŭsie pravavyja pracedury całkam vykonvajucca.