Makiej vystupiŭ suprać raźmiaščeńnia naziralnikaŭ na ŭkrainska-biełaruskaj miažy
Ministr zamiežnych spraŭ Biełarusi Uładzimir Makiej zajaviŭ, što znachodžańnie na ŭkrainska-biełaruskaj miažy naziralnikaŭ z zachodnich krain budzie traktavacca jak uciahvańnie apošnich u vajnu. Jon skazaŭ heta ŭ kułuarach pasiadžeńnia Rady MZS SND u Astanie, adkazvajučy na pytańni žurnalistaŭ.
Fota: MZS Biełarusi
«Ja tut zhodzien z acenkaj, jakaja prahučała z rasijskaha boku. Kali buduć nakiravanyja adpaviednyja pradstaŭniki zachodnich krain na miažu Biełarusi i Ukrainy, to heta aznačaje faktyčna ŭciahvańnie hetych trecich krain va ŭkrainski kanflikt», — skazaŭ kiraŭnik viedamstva.
Na pytańnie, ci budzie raźmiaščeńnie takoha kantynhientu ŭjaŭlać saboj pahrozu nacyjanalnaj biaśpiecy Biełarusi, Makiej adkazaŭ tak:
«Hledziačy ź jakimi namierami pryjduć hetyja naziralniki abo jakoj zbrojaj jany buduć uzbrojenyja. Ale toje, što ciapier adbyvajecca i na paŭdniovych našych miežach, i na zachodnich, — my bačym, što nahniatajecca isteryja. I nie prosta idzie, skažam, słoŭnaja niejkaja rytoryka. A robiacca kankretnyja dziejańni: pierakidajucca bajavaja technika, uzbrajeńni, źbirajucca vajskoŭcy. Viadoma, my nie pavinny zakryvać na heta vočy. Naturalna, buduć vypracoŭvacca adekvatnyja miery reahavańnia. U tym liku i vajennaha charaktaru», — zajaviŭ Makiej.
Prapanovu raźmiaścić na miažy mižnarodnych naziralnikaŭ prezident Ukrainy Uładzimir Zialenski vykazaŭ učora, vystupajučy pierad lidarami krain G7. Na jaho dumku, heta dapamoža źniać pravakacyi i domysły pra pahrozu Biełarusi z boku Ukrainy.
Siońnia pa hetym pytańni vykazvaŭsia taksama dziaržsakratar Rady Biaśpieki Biełarusi Alaksandr Valfovič, i jahonaja pazicyja była bolš pamiarkoŭnaja. Pavodle jahonych słoŭ, kali Ukrainie heta patrebna, to chaj i raźmiaščaje, a Biełaruś u hetym udzielničać nie budzie. Kateharyčna suprać jon vykazaŭsia tolki suprać raźmiaščeńnia na biełaruska-ŭkrainskaj miažy vajskoŭcaŭ z Zachadu.