«Padpolna pražyvaje arhanizatar pseŭdarelihijnaj hramady «Małady front»
Nieviadomyja raskleili ŭlotki suprać Źmitra Daškieviča na Partyzanskim praspekcie ŭ Miensku.
Nieviadomyja raskleili ŭlotki z partretam lidera «Maładoha frontu» Źmitra Daškieviča na Partyzanskim praspekcie ŭ Miensku, u rajonie, dzie žyvie moładzievy lider,— na słupach, na padjezdach damoŭ i ŭ padziemnych pierachodach. Ulotki padpisanyja niejkim «Baćkoŭskim kamitetam pa abaronie pravoŭ i svabodaŭ dziaciej».
Pad partretam zrobleny dopis, u jakim ukazvajecca numar doma i kvatery, dzie žyvie Z.Daškievič. Taksama
va ŭlotcy skazana, što ŭ hetaj kvatery «padpolna pražyvaje arhanizatar pseŭdarelihijnaj hramady «Małady front», tak zvany «Źmicier», jakija viarbuje ŭ svaju sektu padletkaŭ i małaletnich dziaciej, zambujučy ich, padachvočvaje ich na ździajśnieńnie hvałtu».
Baćkoŭski kamitet pa abaronie pravoŭ i svabodaŭ dziaciej, jaki padpisaŭ ulotku, prapanuje pahladzieć skandalny videafilm «Małady Front. Kidnepinh», raniej pakazany pa biełaruskim telebačańni, pa spasyłcy ŭ internecie.
«Bačna, što specsłužby raspracoŭvajuć novyja kreatyŭnyja metady ŭcisku na pradstaŭnikoŭ demakratyčnaha ruchu. Im zdajecca, što heta budzie mieć niejki efekt, chacia ja sumniajusia»,- skazaŭ u interviju Źmicier Daškievič.
Jon taksama skazaŭ, što «Maładomu frontu» ničoha nie viadoma pra tak zvany «baćkoŭski kamitet».