Z słuchańniaŭ pa AES — za kraty
Kaardynatar rasijskaj hrupy «Ekozaŝita» fizyk-atamščyk Andrej Ažaroŭski asudžany sudom Astravieckaha rajonu da siami sutak aryštu. Jaho abvinavacili ŭ drobnym chulihanstvie.
Kaardynatar rasijskaj hrupy «Ekozaŝita» fizyk-atamščyk Andrej Ažaroŭski asudžany sudom Astravieckaha rajonu da siami sutak aryštu. Jaho abvinavacili ŭ drobnym chulihanstvie.
Hramadzkija słuchańni ŭ Astraŭcy adnosna budaŭnictva atamnaj stancyi adbylisia pa scenary ŭładaŭ: z prapusknoj systemaj AMAPu i padrychtavanych vystupoŭcaŭ, jakija ahitavali za budaŭnictva AES. Źviedali na sabie metady pravaachoŭnaj systemy Biełarusi i zamiežnyja ŭdzielniki abmierkavańnia: kaardynatar rasiejskaj hrupy «Ekozaŝita» fizyk-atamščyk Andrej Ažaroŭski asudžany sudom Astravieckaha rajonu da siami sutak aryštu. Jaho abvinavacili ŭ drobnym chulihanstvie.
Padobnaha merapryjemstva rajonny Astraviec, sa słoŭ miascovych žycharoŭ, dahetul nia bačyŭ. Ad samaj ranicy na ŭjeździe ŭ horad patrulnyja milicejskija aŭto spyniali, čamuści, pieravažna aŭtobusy.
U horadzie na kožnym skryžavańni milicyjant, a miascovy kinateatar, dzie adbyvalisia słuchańni — u kole AMAPu. Praviarali ludziej i toje, što ŭ ich było ŭ rukach. Apazycyjanera Valeryja Ščukina nie puskali, maŭlaŭ, pačakajcie, jašče ničoha nie pačałosia..
Na ŭvachodzie ŭ kinateatar sustrakajuć «valantery» spartovaha ciełaskładu padstryžanyja pad kanadku.
Na pačatku 11-j hadziny zala amal poŭnaja, chacia ŭ prahramie havorycca, što rehistracyja pačynajecca z 10:00. Zala rajonnaha kinateatru źmiaščaje nia bolej za 300 čałaviek, vidavočna, što tyja, chto ŭžo siadzić, pryjšli siudy raniej za 10-ju hadzinu.
Baču, što heta pieravažna ludzi ź bližejšych kałhasaŭ i ź miascovych pradpryjemstvaŭ. Žančyna z Varnianaŭ patłumačyła, što ŭ ich pravodzili ahulny schod i vyłučyli delehataŭ.
Pytajusia ŭ viaskoŭcaŭ — ci padtrymlivajuć jany budaŭnictva AES? U mnohich reakcyja saramlivaja, advaročvajucca, niekatoryja kažuć, što, mahčyma, znojdziecca niadrennaja praca, a bolšaść śćviardžaje, što pryjechali paprostu pasłuchać.
Pierad samym pačatkam słuchańniaŭ vidać, što ludzi, jakija nie nie pradstaŭlajuć nijakich kalektyvaŭ i zaranioŭ nie padavali zajavak na ŭdzieł, u zalu nia trapiać.
Nasamreč, sustrakaju Anatola Labiedźku, jakoha razam z kalehami da apošniaha nie prapuskaŭ AMAP. Jon vykazvaje svajo ździŭleńnie nievierahodnymi mierami biaśpieki.
Słuchańni pačalisia. Na vulicy doždž, zapuścili ŭsich achvotnych u faje kinateatru. Ale zadać pytańni ci vystupić hetyja ludzi nia majuć mahčymaści. Pierad dźviaryma ŭ zalu ščylna stajać «valantery»… Viadziecca tranślacyja na vulicu, jakoj užo nichto tam nia słuchaje…
Pieršym vystupaje namieśnik ministra enerhietyki, spadar Michadziuk. U jaho słovach adzin pazytyŭ: usio spraŭdžana, praličana, usio zapracuje, bo inšaha vyjścia niama…
Paśla jaho jašče niekalki navukoŭcaŭ na niezrazumiełaj dla viaskoŭcaŭ leksycy davodziać plusy ad budaŭnictva AES… Ludzi słuchajuć i plaskajuć u dałoni….
Vystupleńni tych, chto «za», nia uvieś čas, adzinki davodziać «suprać». Im taksama plaskajuć u dałoni, ale troški ściplej.
Vystupoŭcy pieravažna nie pradstaŭlajucca, čytajuć z papierak, niekatoryja navat z kamsamolskim zapałam, i zala reahuje adpaviedna zapału. Dyrektar škoły z Mastoŭskaha rajonu nie chavaje, adkul jon, i davodzić, što pryjechaŭ siudy specyjalna ad usiaho kalektyva, bo ŭ «XXI stahodździ treba žyć z atamnaj enerhijaj».
Vystupili miascovyja apazycyjanery: Ivan Kruk i Mikoła Ułasievič — jany suprać, ale ich čamuści uvieś čas pierabivali i nie dali mahčymaści dasłuchać…
AMAP zatrymaŭ maskoŭskaha ekolaha Andreja Ažaroŭskaha, jaki nibyta chacieŭ ŭsienarodna skrytykavać prajekt samaj nadziejnaj stancyi. Jaho zabrali ŭ pastarunak, a paźniej stała viadoma, što asudzili na 7 sutak nibyta za łajanku pobač z respublikanskimi hramadzkimi słuchańniami.
Ludzi vychodzili z zali kinateatru i nichto ni z kim nie spračaŭsia, moŭčki, nichto nikoha ni ŭ čym nie pierakonvaŭ. Vidavočna, što ŭsio vyrašyli.