Minzdaroŭja dumaje, kab abmiežavać biełarusam, jakija źjechali za miažu, dostup da niekatorych miedycynskich pasłuh
U Ministerstvie achovy zdaroŭja Biełarusi prapracoŭvajuć pytańnie ab źmianieńni padychodaŭ da akazańnia biaspłatnaj mieddapamohi. Havorka pra toje, kab biełarusam, jakija pražyvajuć u inšych krainach i pryjazdžajuć na radzimu lačycca, abmiežavać biaspłatnaje atrymańnie niekatorych vidaŭ miedpasłuh.
Pra heta ŭ efiry telekanała STB raspaviała pieršy namieśnik ministra achovy zdaroŭja Biełarusi Alena Kratkova.
Pa słovach Kratkovaj, u biełaruskim Ministerstvie achovy zdaroŭja ŭžo nieadnarazova padychodzili da hetaj temy.
— Uličvajučy, što ŭ nas sacyjalnaja dziaržava, u hety momant jakraz idzie prapracoŭka tych vidaŭ miedycynskaj dapamohi, jakaja praduhledžvajecca suhramadzianam, jakija nie ŭdzielničajuć u padatkaabkładańni, — patłumačyła pieršy namieśnik ministra achovy zdaroŭja.
Ciapier u Ministerstvie achovy zdaroŭja vyrašajecca pytańnie, kab atrymać dostup da bazy danych biełarusaŭ, jakija nie pracujuć u krainie.
Pa słovach Aleny Kratkovaj, takija katehoryi biełarusaŭ mohuć raźličvać na akazańnie płanavaj i ekstrannaj mieddapamohi. Naprykład, im biaspłatna mohuć vyrazać apiendycyt. A voś niekatoryja vidy miedycynskich pasłuh, jak stamatałahičnyja, mahčyma, stanuć płatnymi.