Rasija vypuściła ŭčora bolš za 100 rakiet pa Ukrainie
Amierykanski Instytut vyvučeńnia vajny (ISW) u svaim štodzionnym biuleteni piša ab sieryi rasijskich udaraŭ rakietami i dronami, naniesienych u piatnicu. Pa danych ukrainskich uład, pa terytoryi krainy było vypuščana bolš za 100 rakiet i siem bieśpiłotnikaŭ Shahed.
Analityki ISW adznačajuć, što rasijski bok pierabolšvaje efiektyŭnaść padobnych udaraŭ, jakija patrabujuć bojeprypasaŭ, kolkaść jakich abmiežavanaja.
Značnych źmien linii frontu niama: rasijskija siły praciahvajuć atakavać na paŭnočny zachad ad Svatava i Kramiannoj (Łuhanskaja vobłaść), u rajonie Bachmuta i na zachadzie Danieckaj vobłaści; paviedamlałasia ab asobnych bajach u Zaparožskaj vobłaści.
U zvodcy taksama apisvajecca epizod z rasijskaj kałonaj braniatechniki, jakaja, jak pišuć «vajenkaraŭskija» telehram-kanały, była razhromlenaja ŭ rajonie Vuhladara. ISW nazyvaje hetuju historyju śviežym bolevym punktam u infarmacyjnaj prastory. Rasijskija pravajennyja błohiery aburajucca tym, što kałona stała lohkaj mišeńniu praz adsutnaść naležnaha prykryćcia: adny ŭskładajuć adkaznaść za hibiel bajcoŭ i źniščeńnie techniki na hienierała Rustama Muradava (pad jaho kamandavańniem u listapadzie rasijanie šturmavali Paŭłaŭku — taksama sa značnymi stratami), inšyja zaklikajuć da publičnych trybunałaŭ nad kamandzirami, jakija praštrafilisia.
Takoha kštałtu krytyka charakternaja dla rasijskich pravajennych błohieraŭ, adznačaje ISW: uskładańnie viny za pravały na asobnych aficeraŭ advodzić uvahu ad sistemnych prablem rasijskich Uzbrojenych sił, u pryvatnaści, ad drennaj padrychtoŭki mabilizavanych. Rasijskija vajskoŭcy aficyjna nie kamientavali straty pry niaŭdałaj sprobie nastupu pad Vuhladaram.