Byłaja žonka Pucina ŭzbahaciłasia na vajnie, jakuju toj raźviazaŭ. Jana zarabiła na mikrakredytach dla prostych rasijan
Mikrafinansavaja arhanizacyja Ludmiły Pucinaj za hod pavialičyła prybytak na 140 młn rasijskich rubloŭ, piša kanał «Možiem objaśniť».
Uładzimir i Ludmiła Puciny raźvialisia ŭ 2013 hodzie. Razam jany pražyli 30 hadoŭ
Zakredytavanaść rasijan dasiahnuła rekordnaha ŭzroŭniu — u vajenny hod finansavyja kampanii vydali pazyk na rekordnyja 27 trłn rasijskich rubloŭ. Na daŭhach prostych ludziej zarabiła i byłaja žonka rasijskaha prezidenta — Ludmiła Ačaretnaja (byłaja Pucina). Źviazanaja ź joj firma «KarMani» (CarMoney) pa vynikach 2022 hoda zarabiła rekordnyja 391,3 młn rasijskich rubloŭ. Jaje čysty prybytak vyras na 66% u paraŭnańni ź mirnym časam, vynikaje sa spravazdačnaści, jakuju pahladzieŭ telehram-kanał «MO». CarMoney vydaje pazyki pad zakład aŭto.
Pucina-Ačaretnaja asabista atrymała ad CarMoney 58 młn rubloŭ u 2022 hodzie. Pra heta havorycca ŭ aŭdytarskim zaklučeńni da finansavaj spravazdačnaści. Vypłaty byli ažyćcioŭleny praz uładalnika mikrafinansavaj arhanizacyi — heta kiprski afšor Carmoney CY LTD. Jon kantralujecca kampanijaj «Mierydyjan», 99% u jakoj naležać byłoj žoncy rasijskaha prezidenta.
Za dva dni da Novaha hoda afšor Ačaretnaj pierastaŭ być uładalnikam CarMoney. Kampanija pierajšła pad rasijskuju jurysdykcyju, a jaje novym ułaśnikam stała TAA «Smarttechhrup». Tak kampanija vyrašyła syści ad ekanamičnych sankcyj z boku Jeŭrasajuza (sama Ačaretnaja ŭžo znachodzicca pad abmiežavańniami niekatorych krain). Ale eks-žonka Pucina mahła zachavać za saboj kantrol nad firmaj, piša vydańnie.