U Biełarusi adbudziecca aŭkcyjon pa prodažy dvuch savieckich viertalotaŭ. Kolki prosiać za 40-hadovuju techniku z Mačuliščaŭ?
Na 13 krasavika naznačany aŭkcyjon pa prodažy dvuch viertalotaŭ Mi-8. Takaja infarmacyja mieścicca na sajcie RUP «Biełśpieckantrakt».
Viertalot Mi-8. Fota: bsk.by
Pačatkovaja cana na abodva varyjanty Mi-8MT adnolkavaja — 525 000 rubloŭ (kala 178 000 dalaraŭ). Toj, chto choča ŭziać udzieł u aŭkcyjonie, musić unieści zadatak u pamiery 105 tysiač rubloŭ (kala $35 600).
Abodva abjekty znachodziacca ŭ Mačuliščach na bazie vajskovaj čaści 06752. Abodva viertalety majuć «prabieh» kala 3000 hadzin. Adzin ź ich adpraŭlali na kapitalna-adnaŭlenčy ramont u 2004 hodzie, a druhi — u 2007. Jany majuć čaćviortuju stupień prydatnaści.
Skrynšot z sajta bsk.by
Jak vyśvietliłasia, hetyja dva vajskovyja viertaloty nie adzinyja, što dziaržava sprabuje pradać.
Aproč hetych dvuch Mi-8MT, na sajcie «Biełśpieckantrakta» možna znajści jašče try viertaloty Mi-2 1981—1987 hadoŭ vypusku. Technika pradajecca minimum ź leta 2016 hoda. Znachodziacca jany ŭ vioscy Piasčanka Viciebskaha rajona. Ceny ad 53 330 da 54 880 rubloŭ (kala 18 300 dalaraŭ).
Aproč hetych troch viertalotaŭ, jakija nie mohuć znajści novaha ŭłaśnika ciaham niekalkich hadoŭ, na sajcie možna znajści infarmacyju ab vyvučeńni popytu na viertalot Mi-26, jaki źjaŭlajecca adnym z samych vialikich u śviecie.
Hety Mi-26 upieršyniu vystaŭlali na prodaž jašče ŭ červieni 2018 hoda. Apošni raz jaho namahalisia pradać u śniežni 2022 hoda, tady za jaho prasili 7 162 726 rubloŭ, što kala 2 750 000 dalaraŭ. U 2019 hodzie za jaho chacieli vyručyć biez małoha 7 miljonaŭ dalaraŭ pa tahačasnym kursie.
Viertalot Mi-26. Fota: bsk.by
«Ciapier z metaj dalejšaj realizacyi viertalota RUP «Biełśpieckantrakt» vyvučaje popyt na jaho, pravodzić markietynhavyja daśledavańni druhasnaha rynku i rychtuje prapanovy dla vyznačeńnia cany jaho realizacyi», — paznačana na sajcie pradaŭca.
Savieckija viertalety ŭ Biełarusi pradavalisia i raniej. Paviedamlałasia, što adzin z realizavanych u 2011 hodzie viertaletaŭ Mi-8 nabyli dla zdymak filma «Ćviordy arešak — 5».