«U niejkim sensie ja ašaleŭ». Mužčyna nabyŭ staroje kresła za 50 dalaraŭ, a zatym zdoleŭ jaho pradać za 108 tysiač
Raskazvajem, jak takoje stała mahčymym.
Błohier Džaścin Miler i jaho zvyčajnaje kresła za 100 tysiač dalaraŭ. Fota: @miztermiller / TikTok
Błohier z Łos-Andželesa nabyŭ na miascovaj internet-barachołcy staroje kresła za 50 dalaraŭ i zdoleŭ jaho pradać za bolš čym 100 tysiač dalaraŭ. Pra heta 8 červienia paviedamiła vydańnie Insider.
Jašče ŭ lutym 33-hadovy tyktokier Džaścin Miler pravodziŭ čas na internet-płatformie Facebook Marketplace, dapamahajučy svajmu siabru ramantavać i abstaloŭvać dom. Mienavita na płatformie jon i zaŭvažyŭ vialikaje staroje kresła niezvyčajnaj formy.
«Ja pahladzieŭ, napeŭna, kožny epizod Antiques Roadshow (brytanskaja prahrama na kanale VVS, u jakoj znaŭcy antykvaryjatu padarožničajuć pa rehijonach Vialikabrytanii i aceńvajuć miascovy antykvaryjat. — «NN»). Ja nie ekśpiert, ale, zdajecca, u mianie jość dobry navyk naziralnaści. Mienavita tamu, kali ja ŭbačyŭ hetaje kresła, to adrazu padumaŭ, što jano sapraŭdy vielmi cikavaje i kaštoŭnaje», — raspavioŭ Džaścin Miler.
Pa słovach Milera, chutki pošuk u Google vydaŭ «varjacki vysokija ceny» na padobnuju meblu. Tady mužčyna pamčaŭsia nabyvać kresła, ale ŭsio jašče nie byŭ upeŭnieny, što hetaja reč nie jość usiaho tolki padrobkaj.
Miler napisaŭ supracoŭnikam aŭkcyjonu Sotheby's (dzie potym i źbiraŭsia pradavać kresła), jakija identyfikavali meblu jak redki stuł z vysokaj śpinkaj ad dackaha dyzajniera mebli Fryca Chienihsiena, jaki byŭ zrobleny ŭ 1935 hodzie sa skury i dubu. Mahčyma, heta byŭ adzin z 50 ekzemplaraŭ padobnaj mebli, jakija ŭvohule byli zroblenyja dackim dyzajnieram.
«Ja zapłaciŭ tady try tysiačy dalaraŭ za kapitalny ramont kresła i tysiaču za dastaŭku na aŭkcyjon Sotheby's. Čakałasia, što jaho prodaž pryniasie ad 30 da 50 tysiač dalaraŭ, ale ŭ vyniku kresła było pradadziena za 108 tysiač dalaraŭ. Kali ja pačuŭ kančatkovuju sumu, to ŭ niekatorym sensie ašaleŭ i sam sabie ŭskliknuŭ: «100 tysiač! Za zvyčajnaje kresła!», — pryvodzić słovy mužčyny vydańnie Insider.
Z hetaj sumy Miler raźličvaje atrymać 70 tysiač dalaraŭ, jakija jon patracić u jakaści pieršapačatkovaha ŭznosu na kuplu svajho ŭłasnaha doma, ale pry hetym nie pierastanie chadzić na pracu, a naadvarot, budzie bolš adkazna padychodzić da hrošaj i abaviazkaŭ.
Na hety momant Džaścin usio jašče šukaje roznyja rečy na Facebook, i ciapier jaho siamja i siabry nie sumniavajucca ŭ jaho mietadach pošuku. Taksama mužčyna praciahvaje zdymać pra heta videa ŭ tyktoku.
Čytajcie taksama:
U Ratamcy vystavili na prodaž konny kłub za 3,8 młn dalaraŭ
U abłomkach «Tytanika» znajšli karali z zubam miehaładona — hihanckaj staražytnaj akuły