Jaŭrejskaja kanfiederacyja adkazała Pucinu: Zialenski — prykład mužnaści dla Ukrainy i śvietu
Jaŭrejskaja kanfiederacyja Ukrainy adkazała na abrazu Uładzimira Pucina, jaki nazvaŭ prezidenta Ukrainy Uładzimira Zialenskaha «hańbaj jaŭrejskaha naroda».
«Uładzimir Zialenski — lidar, jaki pakazaŭ prykład mužnaści svajmu narodu i ŭsiamu śvietu. Uładzimir Zialenski — hieroj nie tolki jaŭrejskaha naroda, ale i ŭsioj palityčnaj ukrainskaj nacyi, da jakoj adnosiacca, viadoma, i jaŭrei. My hanarymsia niepachisnaj stojkaściu našaha prezidenta, jaki abaraniaje demakratyčnyja kaštoŭnaści, svabody i miralubnyja pravy Ukrainy i našych hramadzian», — cytuje słovy kanfiederacyi «Ukrainskaja praŭda».
Taksama ŭ zajavie kanfiederacyi adznačajecca, što ŭ sučasnaj Ukrainie, tym bolš na dziaržaŭnym uzroŭni, niama nijakaha «nieanacyzmu», jak pra heta chłusić Pucin.
Akramia taho, kanfiederacyja padkreśliła, što va Ukrainie, u pryvatnaści, bytavy antysiemityzm — adzin z samych nizkich u Jeŭropie, a paśla 24 lutaha 2022 hoda jaho praktyčna nie nazirajecca.
Što da abvinavačańniaŭ ukraincaŭ u złačynstvach časoŭ Chałakostu, to kanfiederacyja nahadała rasijskamu dyktataru, što Ukraina — čaćviortaja ŭ śviecie kraina pa kolkaści praviednikaŭ narodaŭ śvietu (ludziej, jakija ratavali jaŭrejaŭ padčas Chałakostu) — usiaho 2 691 čałaviek, pavodle źviestak «Jad va-Šem». Pa danych ukrainskich daśledčykaŭ, ukraincaŭ-praviednikaŭ naličvajecca bolš za 15 tysiač. Na ich rachunku — sotni tysiač vyratavanych žyćciaŭ jaŭrejaŭ.
«Mienavita pry prezidencie Uładzimiru Zialenskim zasnavany Dzień ukraincaŭ, jakija ratavali jaŭrejaŭ padčas Druhoj suśvietnaj vajny. Jon adznačajecca na dziaržaŭnym uzroŭni 14 maja», — havorycca ŭ zajavie.
Kanfiederacyja prademanstravała fota mienory ŭ miemaryjale «Drabicki Jar» u vakolicach Charkava, dzie padčas Chałakostu nacysty rasstralali kala 20 tysiač viaźniaŭ Charkaŭskaha hieta.
«Zdymak zrobleny adrazu paśla rasijskaha abstrełu 26 sakavika 2022 hoda», — adznačyli ŭ kanfiederacyi.