Kazus u Varšavie. Achoŭnikaŭ prezidenta PAR nie prapuściła achova ŭ aeraporcie. Tyja zajavili pra rasizm
Polskija pamiežniki zatrymali ŭ aeraporcie Varšavy samalot z achoŭnikami prezidenta PAR, jaki prylacieŭ u Jeŭropu na pieramovy ź lidarami Ukrainy i Rasii. Načalnik prezidenckaj achovy abvinavaciŭ palakaŭ u rasiźmie, ale tyja zapiarečyli, što ŭ haściej prosta nie było dakumientaŭ na častku zbroi.
Prezidenty (sprava naleva) Paŭdniovaj Afryki Sirył Ramafosa, Kamorskaha Sajuza Azali Asumani, Sieniehała Maki Sal, Zambii Chakainde Chičylema (prysieŭšy) staviać śviečki na brackaj mahile achviar rasijskaj ahresii ŭ Bučy pad Kijevam, 16 červienia 2023 hoda
Samalot z prezidenckaj achovaj i žurnalistami byŭ zatrymany ŭ Varšavie ŭ čaćvier, i pieršyja 24 hadziny polskija pamiežniki nikoha ź jaho nie vypuskali, piša Bi-bi-si.
Zatym častcy pasažyraŭ dazvolili vyjści ŭ horad i pasialicca ŭ hatelach, ale samalot i bahaž, jak abviaściła pres-słužba aeraporta, buduć zatrymanyja da niadzieli.
Prezident PAR Sirył Ramafosa prylacieŭ u Jeŭropu ŭ składzie delehacyi afrykanskich lidaraŭ, jakaja choča pasprabavać schilić prezidentaŭ Rasii i Ukrainy da mirnych pieramoŭ. U čaćvier delehacyja sustrakałasia z prezidentam Polščy Andžejem Dudam, u piatnicu naviedała Kijeŭ, a ŭ subotu płanuje sustreču z Pucinym u Sankt-Pieciarburhu.
Načalnik achovy Ramafosa hienierał-major Uoli Raade byŭ vielmi aburany tym, što jaho bos zastaŭsia biez častki ciełaachoŭnikaŭ.
«Jany nas zatrymlivajuć, jany padviarhajuć žyćcio našaha prezidenta niebiaśpiecy! My ŭžo pavinny byli być u Kijevie, a jany vuń što robiać! Ja chaču, kab vy bačyli, jakija jany tut rasisty!» — zajaviŭ hienierał.
Pres-sakratar ministra-kaardynatara śpiecsłužbaŭ Polščy Stanisłaŭ Žaryn nazvaŭ abvinavačańni ŭ rasiźmie łuchtoj i patłumačyŭ, što ŭ paŭdniovaafrykanskich ciełaachoŭnikaŭ byli nie ŭ paradku dakumienty na zbroju.
Z takim ža tłumačeńniem vystupili i pamiežniki.
«U čalcoŭ delehacyi była zbroja, na ŭvoz jakoj nie było dazvołu. Ale sami jany mieli mahčymaść vyjści z samalota», — napisała pamiežnaje viedamstva Polščy ŭ tvitary.
Pres-sakratar prezidenta PAR Vinsient Mahvieńja skazaŭ, što ich delehacyja sprabuje damovicca, kab pasažyry zatrymanaha čartarnaha rejsa patrapili choć by na Sankt-Pieciarburhskuju častku turne prezidentaŭ.
Niahledziačy na toje, što achoŭniki prezidenta Ramafosa zatrymalisia ŭ Varšavie, sam jon razam ź inšymi prezidentami pryjechaŭ u piatnicu ŭ Kijeŭ. Vinsient Mahvieńja zapeŭniŭ u tvitary, što jaho biaśpieka była całkam harantavanaja.
U afrykanskuju delehacyju, akramia Ramafosa, uvachodziać prezidenty Sieniehała, Zambii i Kamorskich Astravoŭ, a taksama pradstaŭniki Jehipta, Respubliki Konha (Brazavil) i Uhandy.
U toj čas, kali jany znachodzilisia ŭ Kijevie, Rasija naniesła pa horadzie i vakolicach čarhovy rakietny ŭdar.
Čytajcie taksama:
Zialenski afrykancam: Nijakich pieramoŭ, pakul rasijskija vojski na ŭkrainskaj ziamli, nie budzie
Voś čamu prapanova krain Afryki daje vialikuju nadzieju Biełarusi
Afrykanskija krainy prapanujuć Ukrainie i Rasii śpis umovaŭ dla pieramoŭ. Tam zhadvajecca i Biełaruś