Hirkin-Strałkoŭ: Raźlik Pryhožyna — na paniku i ŭziaćcie ŭłady, jakaja «valajecca na ziamli»
Ihar Hirkin-Strałkoŭ, były «ministr abarony» samaabvieščanaj «DNR», aktyŭny krytyk Kramla z «patryjatyčnych» pazicyj, vykazaŭ mierkavańnie, na što, na jahonuju dumku, raźličvaje Pryhožyn u svaim «bliskuča-dziorzkim nabiehu» i ci maje hety nabieh šancy na pośpiech.
Pavodle Hirkina, «stratehičnaja zadumka kamandy Pryhožyna hranična jasnaja, łahičnaja, vielmi ryzykoŭnaja, ale dzivić advahaj i maje šancy na pośpiech».
Pośpiech zadumcy, na dumku błohiera, moža prynieści «niepavarotlivaść i dematyvacyja ŭsich siłavych struktur Rasijskaj Fiederacyi».
Niezdarma Pryhožyn, zamacavaŭšysia ŭ Rastovie, adrazu ž rezka kinuŭ u rejd na Maskvu niekalki tysiač čałaviek z samych bajazdolnych svaich padraździaleńniaŭ. Hetyja padraździaleńni abychodziać usie bujnyja centry i nie ŭviazvajucca ŭ bai ź miascovymi harnizonami, a imknucca jak maha chutčej dabracca da Maskvy.
Raźlik, jak miarkuje Hirkin, robicca na paniku i ŭcioki ŭsich vyšejšych čynoŭnikaŭ i ŭziaćcie pry takich umovach ułady, jakaja «valajecca na ziamli». Dalej ža ŭžo, maŭlaŭ, usie kinucca jamu davać prysiahu na viernaść, «a tam vidać budzie».
U hetaj stratehii Hirkin bačyć tolki dva słabyja miescy.
Pieršaje — heta mahčymaść sutyknieńnia z bajazdolnymi i matyvavanymi da zmahańnia adnosna bujnymi čaściami jašče da padychodu da Maskvy. U takim vypadku niepaźbiežnyja prablemy z zabieśpiačeńniem udarnaj hrupoŭki, jakaja daŭžej dvuch-troch dzion vieści bai ŭ adryvie ad zabieśpiačeńnia nie zmoža.
«Słužyłych ludziej» u Maskvie vidavočna bolš, čym bajazdolnych vahnieraŭcaŭ, ale pytańnie, jak miarkuje Hirkin, u tym, kolki ź ich hatova zmahacca. Heta i vyśvietlicca ŭ samy najbližejšy čas. U hetym, jak śćviardžaje Hirkin, i jość «usia «intryha» i kluč da zychodu hetaha bliskuča-dziorzkaha «nabiehu».