Biełaruskim i rasijskim tenisistam pastrožyli ŭmovy ŭdziełu va Uimbłdonie
Arhkamitet tenisnaha Uimbłdonskaha turniru zrabiŭ bolš strohimi ŭmovy ŭdziełu dla rasijan i biełarusaŭ. Ciapier jany pavinny dakazać, što razarvali kantrakty z padsankcyjnymi kampanijami.
Biełaruskaja tenisistka Aryna Sabalenka. Fota: AP Photo/Thibault Camus
Dekłaracyju ab niejtralitecie, jakuju pavinny byli padpisać biełaruskija i rasijskija tenisisty dla ŭdziełu va Uimbłdonie, u minułym miesiacy dapoŭnili, jak paviedamlaje BBC Sport. Spartsmieny, jakija padpisali dakumient, pavinny dakazać, što razarvali kantrakt z kampanijami, jakija kirujucca abo kantralujucca asobami pad zachodnimi sankcyjami.
Inicyjataram takoha ŭzmacnieńnia surovaści vystupiŭ urad Vialikabrytanii, a kantrol uskładzieny na hałoŭnaha sudździu turniru Džery Armstranha.
Pad pytańniem ciapier udzieł, jak minimum, 26-hadovaj rasijanki Vieraniki Kudermietavaj, jakuju spansuje «Tatnafta». Adzin z naftahazavych hihantaŭ Rasii trapiŭ pad sankcyi ES hod tamu. Dvanaccataja rakietka śvietu nasiła łahatyp «Tatnafty», udzielničajučy ŭ turnirach WTA Tour.
U minułym hodzie biełaruskich i rasijskich tenisistaŭ uvohule nie dapuścili da Uimbłdona. U hetym siezonie arhkamitet prapanavaŭ u jakaści propusku na turnir padpisać asabistuju dekłaracyju ab niejtralitecie.
Zhodna z dakumientam, atlety buduć vystupać u niejtralnym statusie pad biełym ściaham. Jany nie mohuć vykazvać padtrymku vajennym dziejańniam va Ukrainie i kiraŭnictvu svaich krain, u tym liku «nasić abo być zaŭvažanymi ź jakim-niebudź pradmietam, jakija źmiaščajuć malunak, simvał, ściah, znaki adroźnieńnia abo emblemu». Umovy vystupleńnia praduhledžvajuć taksama admovu ad finansavańnia dziaržavaj albo kampanijami, jakija niejkim čynam źviazanyja ź siłavymi strukturami abo jakija znachodziacca pad sankcyjami.
Čytajcie taksama:
Nie vytrymała cisku? Čamu Sabalenka pryznałasia, što nie padtrymlivaje vajnu
«Nie ciarpicca paŭdzielničać». Sabalenka atrymała brytanskuju vizu i jedzie na Uimbłdon