U Vałožynie rekanstrujujuć histaryčny budynak byłoj ješyvy
Heta pieršaje vyšejšaje duchoŭnaje vučylišča na terytoryi Uschodniaj Jeŭropy pa padrychtoŭcy rabinaŭ, jak paviedamlaje BiełTA.
Pavodle prajekta, tut stvorać šmatfunkcyjanalnuju prastoru, dzie buduć pravodzicca tematyčnyja mierapryjemstvy, ekspanavacca knihi i pradmiety mastactva. Dobraŭparadkujuć prylehłuju terytoryju, ustalujuć małyja architekturnyja formy.
Ciapier na abjekcie pracujuć budaŭniki: demantujuć padłohi, dach, akonnyja i dźviarnyja prajomy, raźbirajuć cahlanyja pieraharodki, miarkujecca frahmient histaryčnaha padmurka adkryć i pakazać naviedvalnikam.
Mastackuju kancepcyju muziejefikacyi abjekta prademanstrujuć tryma ekspazicyjnymi zonami.
Pieršaja — dla pakazu ekspanataŭ, jakija adlustroŭvajuć historyju ješyvy: tvory jaje zasnavalnikaŭ i roš-ješyva, pracy Vilenskaha haona, pradmiety judaiki, jakija supravadžali paŭsiadzionnuju dziejnaść i śviatočnaje žyćcio ješyvy, hrafika.
Druhaja ekspazicyjnaja zona — dla demanstracyi kalekcyi archieałahičnaha materyjału, atrymanaha ŭ pracesie archieałahičnych raskopak ź leta 2022 hoda, što i daje raznastajny materyjał dla raskryćcia budaŭničaj historyi ješyvy, i charaktaryzuje jaje materyjalnuju kulturu. Kalekcyja praciahvaje pieršy kulturna-histaryčny raździeł i adlustroŭvaje roznyja pieryjady ŭ historyi Vałožynskaj ješyvy.
U treciaj ekspazicyjnaj zonie — ekspanaty, jakija adlustroŭvajuć naradžeńnie novaj kultury ŭ asiarodździ słuchačoŭ i vybitnych vypusknikoŭ ješyvy, uździejańnie idej ješyvy na suśvietnuju kulturu XX—XXI stahodździaŭ.